Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 179 Hüküm no: 165 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ücret karşılığında Halil Çelebi’ye hizmet eden Râbia Hatun’un birikmiş alacağı için açtığı davanın sulhla sonuçlandığı Sulh ve ibrâ. Mahmiye-i İstanbul’da Altımermer kurbünde Öksüzce Hatîb mahallesi sâkinelerinden olup zâtı ma‘rifet-i şer‘iye ile ârifân mahalle-i mezbûre âhâlisinden Mehmed Ağa b. Hüseyin ve Mustafa Çavuş b. Mehmed nâm kimesneler ta‘rîfleriyle mu‘arrefe olan Râbia Hatun bt. Mehmed meclis-i şer‘-i şerîf-i enverde işbu bâ‘isü’l-vesîka Halil Çelebi b. Mesud muvâcehesinde ikrâr ve takrîr-i kelâm edip ben ücret ile hizmet eder makūlesinden olup merkūm Halil Çelebi’ye beş sene hizmet etmemle sinîn-i mezkûrede müctemi‘ olan ecr-i mislimi merkūm Halil Çelebi’den taleb ve da‘vâ sadedinde olduğumda beynimizde münâza‘ât-ı kesîre vâkı‘a olmuşidi. El-hâletü-hâzihi beynimizde muslihûn tavassut edip da‘vâ-yı mezkûremden fâriğa olup husûs-ı mezkûra ve târih-i kitâba gelince beynimizde cereyân eden hukūk-ı ma‘lûme ve mechûleye müte‘allika âmme-i de‘âvî ve kâffe-i mutâlebâtdan işbu merkūm Halil Çelebi’nin zimmetini ibrâ ve ıskāt eylediğimde ol dahi kezâlik hukūk-ı ma‘lûme ve mechûleye müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-Zilhicceti’ş-şerîfe sene [1]143. Şuhûdü’l-hâl: Hasan Çelebi b. Ahmed Mehmed Çelebi b. Halil, İshak Çelebi b. Süleyman, Mustafa Çelebi b. Ahmed, Ahmed Bey b. el-Hâc Mehmed, Mehmed Çelebi b. Şa‘ban, Mustafa Efendi b. Ahmed.