Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 227 Hüküm no: 221 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun’un Galata’nın Sultanbayezid mahallesindeki ev hissesini sattığı Mübâya‘a rub‘ hisse. Mahmiye-i İstanbul’da ( ) mahallesi sâkinelerinden Fâtıma bt. Ebûbekir b. Abdullah tarafından vekîl olduğu zât-ı mezbûreyi ma‘rifet-i şer‘iye ile ârifân Ahmed Çelebi b. İsa ve Mehmed b. Mahmud şehâdetleriyle sâbit olan zevci Osman b. Mustafa meclis-i şer‘-i şerîf-i enverde işbu hâfızü’l-kitâb Cafer Ağa b. Ahmed mahzarında bi’l-vekâle ikrâr-ı tâm ve takrîr-i kelâm edip arsası merhûme Belkıs nâm hatun vakfına senede iki yüz kırk akçe mukāta‘a-i kadîmesi ile rub‘u müvekkilem mezbûre Fâtıma Hatun’un ve rub‘u müşteri-yi mezbûr Cafer Ağa’nın ve nısf-ı âharı Zeyneb Hatun’un taht-ı tasarrufumuzda ve ebniyesi kezâlik silk-i mülkümüzde münselik olup mahrûse-i Galata mahallâtından Sultan Bâyezid mahallesinde vâki‘ bir tarafdan Zeyneb nâm hatun menzili ve bir tarafdan el-Hâc Halil odaları ve bir tarafdan Kiryako zimmî menzili ve bir tarafdan tarîk-ı âm ile mahdûd bir bâb fevkānî oda ve bir bâb tahtânî odayı muhtevî menzilin ebniye-i memlûkesinde olan rub‘ hisse-i irsiyesini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Cafer Ağa’ya altmış guruşa bey‘ ve temlîk ve teslîm ve arsasında olan rub‘ hisse-i irsiyemi dahi bâ-izn-i mütevellî meccânen ferâğ <> ve tefvîz eylediğimde mezbûr Cafer Ağa dahi iştirâ ve temellük ve tefevvüz ve kabûl eylediğinden sonra semeni olan meblağ-ı mezbûr altmış guruş mezbûr Cafer Ağa yedinden tamamen ahz u kabz eyledim. Ba‘de’l-yevm menzil-i mahdûd-ı mezbûrun ebniyesinde olan rub‘ hisse-i irsiyesi mezbûr Cafer Ağa’nın mülk-i müşterâsı ve arsasında olan rub‘ hissesi dahi dâhil-i havza-i tasarrufu olmuşdur. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 6 min-Muharremi’l-harâm sene [1]144. Şuhûdü’l-hâl: Sultan kethudâsı Ömer Ağa b. Ali, Kimyâcı Ahmed Ağa, Hüseyin Efendi dâmad-ı Mustafa Ağa, İbrahim Çelebi b. Mustafa, Mehmed Çelebi b. Abdullah.