Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 265 Hüküm no: 268 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohri eski valisi Hocazâde Eyüb Paşa’nın Ahmed Efendi ile alacak davasınında sulh olduğu Sâbıkā Ohri vâlîsi paşa-yı mükerrem Hocazâde Eyüb Paşa b. Hasan Paşa meclis-i şer‘-i şerîf-i enverde mefharü erbâbü’t-tahrîr ve’l-kalem bâ‘isü hâze’l-kitâb Ahmed Efendi b. Mahmud b. [Abdur]rahman tarafından husûs-ı âti’l-beyâna vekîl olduğu Osman Ağa b. Ahmed ve Mehmed Bey b. Hüseyin şehâdetleriyle sâbit ve sübût-i vekâletine hükm-i şer‘î lâhık olan Mehmed Ağa b. Ahmed nâm kimesne mahzarında ikrâr ve takrîr-i kelâm edip bin yüz otuz yedi târihinde zikrolunan Ohri sancağı tasarrufumda iken zikrolunan Ohri hâsıllarından İşim kazâsına tâbi‘ Mortil ve tevâbi‘i Mos karyeleri vezîriazam-ı sâbık müteveffâ İbrahim Paşa zamanında Şamdânî Mehmed Ağa ve müvekkil-i mezbûr Ahmed Efendi’ye ber-vech-i iştirâk mâlikâne olmağla iki yük otuz bir bin dört yüz on akçe mal-ı mîrîleri tarafıma edâ olunmamağın mal-ı mezkûrdan müvekkil-i [66a] mezbûr Ahmed Efendi’nin nısf hissesine lâzım gelen bir yük on beş bin yedi yüz beş akçeyi müvekkil-i mezbûrdan taleb ve da‘vâ eylediğimde ba‘de vukū‘ı’l-münâza‘a beynimize muslihûn tavassut edip da‘vâ-yı mezkûremden beni müvekkil-i mûmâ-ileyh ile seksen dört bin akçe üzerine sulh eylediklerinde ben dahi sulh-ı mezkûru kabûl ve bedel-i mezkûrun on beş bin akçesini müvekkil-i mûmâ-ileyhin voyvodası Yahya’nın vekîli gāib ani’l-meclis Ali nâm kimesne yedinden mukaddemâ ba‘de’l-kabz mâ‘adâ altmış dokuz bin akçeyi müvekkil-i merkūm mâlından olmak üzere vekîl-i mezbûr yedinden ahz u kabz eylediğimden sonra husûs-ı mezkûra müte‘allika da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 19 min-Zilhicceti’ş-şerîfe sene [1]143. Şuhûdü’l-hâl: Kethudâ Mustafa Efendi, Mehmed Çelebi b. ( ) tâbi‘-i nâib efendi, Mustafa b. Ali, Mehmed Beşe b. İbrahim, İbrahim Efendi kâtib-i dîvân, Hüseyin Ağa el-mübâşir.