Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 265 Hüküm no: 269 Orijinal metin no: [66a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babalarından Abdullah Efendi ile Emetullah Hatun’a kalan ve mülknâmesi yanan arsa için mahalle halkının şahitliğiyle ellerine vesika verildiği Mahmiye-i İstanbul’da Hoca Kasım-ı Gönânî mahallesi sükkânından bâ‘isü hâzihi’l-vesîka Abdullah Efendi b. Abdülbaki Efendi nâm kimesne meclis-i şer‘-i şerîf-i enverde takrîr-i kelâm ve bast-ı merâm edip mahalle-i mezbûrede vâki‘ bir tarafdan Kundakcı Mustafa Çelebi menzili ve bir tarafdan Nişancı-ı atîk vakfından müteehhilîn odaları arsası ve bir tarafdan Helvâcı Mehmed menzili ve taraf-ı râbi‘i tarîk-ı âm ile mahdûd be-hesâb-ı terbî‘î tahmînen iki yüz zirâ‘ arsa-i hâliye bundan akdem fevt olan babam mezbûr Abdülbaki Efendi’nin babası Derviş Efendi’nin ile’l-vefât yedinde mülk ve hakkı olup ba‘de vefâtihî babam mezbûr Abdülbaki Efendi’ye irsle intikāl etmekle ba‘de vefâtihî bana ve karındaşım Abdurrahman Efendi’ye ale’l-iştirâki’s-seviy intikāl eylediğinden sonra karındaşım mezbûr Abdurrahman Efendi dahi fevt olup verâseti sulbiye kebîre kızı Emetullah ile bana münhasıra olmağla ben mezbûre Emetullah ile mutasarrıflar olup lâkin arsa-i mezkûrenin mülknâmeleri harîk-ı kebîrde muhterik olmağla hakīkat-i hâl ahâlî-i mahalle-i mezbûreden istihbâr ve takrîrleri tahrîr olunup kıbel-i şer‘den yedime vesîka i‘tâ olunmak matlûbumdur dedikde husûs-ı mezbûr ahâlî-i mahalle-i mezbûreden hâzırûn bi’l-meclis Müezzin Süleyman Halîfe ve Ali Bey b. Abdülhalim ve es-Seyyid Hüseyin b. es-Seyyid Mehmed ve Kapıcızâde Mustafa b. Ramazan nâm kimesnelerden suâl olundukda fi’l-hakīka merkūm Abdullah Efendi’nin takrîr-i meşrûhu üzere mezbûrânın yedlerinde mülk-i mevrûslarıdır deyü her biri alâ-tarîkı’ş-şehâde haber vermeleriyle mûcebince arsa-i mahdûd-ı mezkûr mezbûrân Abdullah Efendi ile mezbûre Emetullah Hatun’un ke’l-evvel zabt ve tasarruflariʼçün işbu vesîka kıbel-i şer‘den ketb ve imlâ mezbûrân Abdullah Efendi ve Emetullah Hatun’un yedlerine def‘ ve i‘tâ olundu. Fî 28 Zilhicce sene [1]143. Şuhûdü’l-hâl: el-Hâc Mehmed Efendi b. Ahmed el-imâm, Mehmed Çelebi b. Abdullah, Ahmed Çelebi b. Hasan, Salih Çelebi b. Süleyman.