Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 266 Hüküm no: 270 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şeyhî Mehmed Efendi’nin bir iş için İsmail Ağa’ya verdiği parayı geri almak için açtığı davanın sulhla sonuçlandığı Mahmiye-i İstanbul’da Koca Mustafa Paşa mahallesi sâkinlerinden Şeyhî Mehmed Efendi b. Mustafa meclis-i şer‘-i şerîf-i enverde bâ‘isü hâze’l-kitâb İsmail Ağa b. Ramazan mahzarında ikrâr-ı tâm ve takrîr-i kelâm [edip] vezîriazam-ı sâbık müteveffâ İbrahim Paşa zamanında bir husûsun temşiyetiʼçün bi-tarîkı’r-rüşve mâlımdan beş yüz guruş def‘ ve teslîm ol dahi ber-vech-i muharrer yedimden ahz etmeğin meblağ-ı mezbûru merkūm İsmail Ağa’dan taleb ve da‘vâ eylediğimde mezbûr İsmail Ağa inkâr etmekle ben müdde‘âmı isbât sadedinde iken ba‘de vukū‘ı’l-münâza‘a beynimize muslihûn tavassut edip da‘vâ-yı mezkûremden beni mezbûr İsmail Ağa ile an-inkâr yüz guruş üzerine sulh eylediklerinde ben dahi sulh-ı mezkûru kabûl ve bedel-i sulh mezkûr yüz guruşu mezbûr İsmail Ağa yedinden ahz u kabz eylediğimden sonra mâ‘adâ dört yüz guruşa müte‘allika âmme-i da‘vâdan mezbûr İsmail Ağa’yı ve işbu İbrahim Ağa ve gāib ani’l-meclis Ahmed b. Abdullah’ı ibrâ-i âmm-ı râfi‘u’l-hısâm ile ibrâ ve ıskāt eylediğimde ol dahi bedel-i sulh-ı mezkûr yüz guruşa müte‘allika âmme-i da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 29 Zilhicce sene [1]143. Şuhûdü’l-hâl: Hasan Ağa b. Hüseyin, İbrahim Ağa b. Mahmud, Mühtedî Ali Ağa b. Mustafa, Ali Ağa b. Mehmed, Attar İbrahim Çelebi b. Osman, Ömer Çavuş.