Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 267 Hüküm no: 271 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın Hoca Kasım Gönânî mahallesinde bulunan arsasını sattığı Mübâya‘a. Mahmiye-i İstanbul’da Hoca Kasım-ı Gönânî mahallesi sâkinelerinden olup zâtı ta‘rîf-i şer‘î ile mu‘arrefe olan Sâliha bt. Abdullah nâm hatun meclis-i şer‘-i şerîf-i enverde bâ‘isü hâze’l-kitâb es-Seyyid İbrahim Efendi b. es-Seyyid Ali kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ iki tarafdan Haremeyn-i şerîfeyn vakfı ve bir tarafdan Ahmed Bey vakfından Gülbûy Hatun tasarrufunda olan vakf arsa ve bir tarafdan tarîk-ı âm ile mahdûd tûlen ve arzen be-hesâb-ı terbî‘î iki yüz zirâ‘ arsa-i hâliye ve bi’r-i mâyı müştemil mülk arsamı bi-cümleti’t-tevâbi‘ ve’l-levâhık tarafeynden îcâb ve kabûlü hâvî ve şürût-ı müfsideden ârî bey‘-ı bâtt-ı sahîh-i şer‘î ile mezbûr es-Seyyid İbrahim Efendi’ye yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr yüz guruşu mezbûr es-Seyyid İbrahim Efendi yedinden tamamen ahz u kabz eyledim. Ba‘de’l-yevm arsa-i mahdûd-ı mezkûrede kat‘a benim alâka ve medhalim kalmayıp mezbûr es-Seyyid İbrahim Efendi’nin mülk-i müşterâsı olmuşdur. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Zilhicce sene [1]143. Şuhûdü’l-hâl: Halil Çelebi b. Mustafa, Osman Beşe b. Mustafa, Fethullah Çelebi b. Ahmed, Ahmed Çelebi b. Derviş Mehmed, el-Hâc Ali b. Hüseyin, İsmail Efendi b. Mustafa Efendi, Mehmed Çelebi b. Abdullah tahtacı.