Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 268 Hüküm no: 272 Orijinal metin no: [66b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cinayete kurban giden Râhib Kiryako ile ilgili davada sulh olduğu Bahr-i Sefîd cezîrelerinden İmroz cezîresine tâbi‘ Kal‘a nâm karye ahâlîlerinden Yorgi v. Polalo ve Kostantin v. Anaştaş ve diğer Kostantin v. Pol[alo] ve Sobran v. Dimitri ve Yanaki v. Zari ve Dimitri ve Yanaki veledey Dimo ve Zafiri v. Yanaki nâm zimmîler asâleten ve karye-i mezbûre ahâlîsinden Todori v. İstraki ve diğer Dimitri v. Mihal nâm zimmîler kendi nefislerinden asâleten ve ahâlî-i karye-i mezbûre kavm-i mahsûr olmağla ber-mûceb-i hüccet ma‘lûmü’l-esâmî ve’l-ensâb zimmîler tarafından zikri âtî husûsu da‘vâya ve lede’l-iktizâ sulh ve ibrâya vekîlleri olmağla vekâleten meclis-i şer‘-i şerîf-i enverde sâbıkā Kilidülbahr dizdârı ve cezîre-i merkūme mütevellîsi işbu bâ‘isü’l-kitâb Mehmed Ağa b. Abdullah mahzarında her biri bi’l-asâle ve bi’l-vekâle ikrâr ve takrîr-i kelâm edip bundan akdem mûmâ-ileyh Mehmed Ağa zamân-ı tevliyetinde karye-i mezbûrede müsâfiren mütemekkin Kiryako nâm râhib cerîhan katîl bulunup kātili nâ-ma‘lûm iken mûmâ-ileyh Mehmed Ağa “karyenizde kan vâki‘ oldu” deyü bizden cebren ve kerhen bi-gayr-ı hakkın üç yüz elli guruşumuzu ahz u kabz etmişidi deyü ber-vech-i muharrer üzerine da‘vâya tesâddî eylediğimizde ol dahi inkâr etmeğin biz müdde‘âmızı isbât sadedinde iken beynimize muslihûn tavassut edip da‘vâ-yı mezkûremizden bizi üç yüz guruş üzerine sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr üç yüz guruşu yedinden ber-vech-i muharrer asâleten ve vekâleten ahz u kabz eylediğimizden sonra mâ‘adâsı olan elli guruşa müte‘allika âmme-i da‘vâdan her birimiz âharı ibrâ-i âmm-ı kātı‘u’n-nizâ‘la ibrâ ve ıskāt eyledik. Mûmâ-ileyh Mehmed Ağa ile husûs-ı mezkûra müte‘allika asla da‘vâ ve nizâ‘ımız yokdur dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Zilhicceti’ş-şerîfe sene [1]143. Şuhûdü’l-hâl: Salih Çelebi b. Nasuh sükkerî, Sipâhi Çelebi çorbacı-yı cebeciyân, el-Hâc İsmail Ağa b. Abdullah, İsmail Çelebi b. Abdullah.