Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 268 Hüküm no: 273 Orijinal metin no: [66b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hudâverdi’nin sağ gözüne vurarak kör eden Mihail’e açtığı davanın sulhla sonuçlandığı Sulh. Mahmiye-i İstanbul’da el-Hâc İsa mahallesinde sâkin Hudâverdi v. Sekyas nâm Ermeni meclis-i şer‘-i şerîf-i enverde bâ‘is-i hâze’s-sifr Mihail v. Avanis nâm Ermeni muvâcehesinde ikrâr ve takrîr-i kelâm edip ve târih-i kitâbdan sekiz ay mukaddem mezbûr Mihail zeberiyle Parmakkapı virânesinde sağ gözüme bi-gayr-ı hakkın darb ve ondan nâşî gözümün ziyâsı zâil ve bi’l-külliye ilimden kalmağla mûceb-i şer‘ini mezbûr Mihail’den taleb ve da‘vâ ve müdde‘âmı isbât sadedinde iken beynimize muslihûn tavassut edip da‘vâ-yı mezkûremden beni mezbûr Mihail ile iki yüz guruşa sulh eylediklerinde ben dahi sulh-ı mezkûru kabûl ve bedel-i sulh-ı mezkûrun elli guruşunu yedinden ba‘de’l-kabz bâkī kalan iki yüz guruşu Mihail’den taleb ve da‘vâ eylediğimde beynimizde münâza‘ât-ı kesîre cereyân etmişdi. El-hâletü-hâzihi mezbûr Mihali on guruş daha bahâ def‘ ve teslîm ben dahi yedinden ahz u kabz eylediğimden sonra mâ‘adâ yüz doksan guruşa müte‘allika âmme-i da‘vâdan mezbûr Mihail’in zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Zilhicceti’ş-şerîfe li-sene selâse ve erba‘în ve mie ve elf. Şuhûdü’l-hâl: Mehmed Çelebi b. Abdullah, İbrahim b. Mustafa, Mehmed b. Abdullah, Mustafa b. Abdullah.