Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 269 Hüküm no: 274 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avram ile Zoli’nin evlilikle ilgili davalarının sulhla sonuçlandığı Da‘vâsından meccânen ferâğ. Mahmiye-i İstanbul’da Kumkapı kurbünde sâkin Avram v. Moyisi nâm zimmî meclis-i şer‘-i şerîf-i enverde bâ‘isetü hâzihi’l-vesîka Zoli bt. Sava nâm Nasrâniye muvâcehesinde ikrâr ve takrîr-i kelâm edip târih-i kitâbdan yirmi iki gün mukaddem mezbûre Zoli nefsini bana tezvîc etmek üzere işbu hazır bi’l-meclis Paskal v. Oseb yediyle mâlımdan otuz guruş irsâl ve îsâl eylediğimde mezbûre Zoli ibâ ve imtinâ‘ etmekle mesfûr Paskal meblağ-ı mezbûr otuz guruşu bana redd ü teslîm ben dahi yedinden ahz u kabz eylediğimden sonra on üç guruş dahi zam ve cem‘an kırk üç guruş mezbûre Zoli kendi menzilinde nefsini bana tezvîc etmek için yedine def‘ ve teslîm ol dahi yedimden ba‘de’l-kabz nefsini âhara tezvîc etmekle ber-vech-i muharrer medfû‘um olan meblağ-ı mezbûru mezbûre Zoli’den taleb ve da‘vâya tesâddî eylediğimde mezbûre Zoli husûs-ı mezkûru inkâr etmeğin ba‘de vukū‘ı’l-münâza‘a beynimize muslihûn tavassutuyla da‘vâ-yı mezkûremden fâriğ ve meblağ-ı mezkûra müte‘allika âmme-i de‘âvî ve mutâlebât ve muhâsamâtdan mezbûre Zoli Nasrâniyeyi ibrâ-i âmm-ı râfi‘u’l-hısâm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 23 min-Zilhicceti’ş-şerîfe sene [1]143. Şuhûdü’l-hâl: Mehmed Çelebi b. Abdullah, Du‘âcı İbrahim b. Mustafa, İbrahim b. Mehmed, Abdullah b. Mustafa, Ahmed b. Hasan, Solak Mustafa b. Ahmed.