Bab Mahkemesi 151 Numaralı Sicil (H. 1143-1144 / M. 1731) cilt: 66, sayfa: 270 Hüküm no: 275 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Abdullah ile Abdullah’ın muhâlaa yoluyla boşandıkları Mahmiye-i İstanbul’da Nahılbend mahallesi sâkinelerinden olup zâtı Mehmed b. Ali ve Mehmed b. Abdullah ta‘rîfleriyle mu‘arrefe olan Zeyneb bt. Abdullah nâm hatun meclis-i şer‘-i şerîf-i enverde zevc-i dâhili bâ‘isü’l-kitâb es-Seyyid Abdullah b. es-Seyyid Mehmed mahzarında takrîr-i kelâm ve ta‘bîr ani’l-merâm edip mezbûr es-Seyyid Abdullah ile beynimizde hüsn-i imtizâcımız olmamağla zimmetinde mütekarrir ve ma‘kūdün-aleyh dört bin akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr es-Seyyid Abdullah ile muhâla‘a-i sahîha-i şer‘iye ile muhâla‘a olduğumda ol dahi hul‘-ı mezbûru ba‘de’l-kabûl hukūk-ı zevciyete müte‘allika da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 2 min-Muharremi’l-harâm sene [1]144. Şuhûdü’l-hâl: Kādızâde İbrahim Çelebi b. Mustafa du‘âcı, Mustafa b. Hasan Muhzır Urfalı, Hasan Çelebi b. el-Hâc Mehmed, Mehmed Çelebi b. Abdullah.