Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 205 Hüküm no: 340 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nesli, Fâtıma ve Mahmud isimli kardeşlerin Arabköyü’ndeki bahçelerini sulh yoluyla Ayşe ve Rabia hatunlara bırakmaları Nesli bint-i Mehmed nâm hatun kıbelinden husûs-ı âtîye vekîl-i şer‘î ve Mahmûd b. Mehmed nâm sagīre kıbel-i şer‘den vasî olup vesâyeti ve vekâleti Pîrî b. Nasuh ve Hüsrev b. Abdullah nâm kimesneler şehâdetleriyle sâbit olan Hüseyin b. Hasan ve Fâtıma bt. Mehmed nâm hatun kıbelinden husûs-ı âtîye şâhidîn-i mezkûrîn şehâdetiyle vekâleti sâbit olan İbrâhim b. Mehmed nâm kimesneler mahzarlarında Âişe ve Rabia bintey Hasan nâm hatunlar kıbelinden husûs-ı âtîye vekîl-i şer‘î olup ve vekâleti Hasan b. Abdullah ve Ali b. Abdullah nâm kimesneler şehâdetiyle sâbit olan Mustafa b. Ahmed nâm kimesne meclis-i şer‘-i şerîfde ikrâr ve takrîr-i kelâm edip kazâ-i havâss-ı Kostantiniyye tevâbi‘inden Arabköyü demekle ma‘rûf olan karye kurbünde vâki‘ olup bir tarafından sâhil-i bahr ile ve bir tarafından tarîk-i âmla ve bir tarafından Bayezid oğlu Memi Çelebi mülkü ile mahdûd olup mezkûre Nesli ve Fâtıma ve Mahmud’un yedlerinde olan bağçe [y]i hükm-i vekâletim ile müvekkileteyn-i mezbûreteynimindir deyü da‘vâ edip ikâmet-i beyyine sadedinde iken müslimûn-ı muslihûn tavassutu ile sulh edip ve zikr olunan bağçeden binâ zirâ‘ıyla yirmi üç buçuk zirâ‘ eni ve yetmiş dört zirâ‘ uzunu olup bir tarafından sâhil-i bahr ile ve bir tarafından tarîk-i âmla ve bir tarafından Bâyezi [d] oğlu Memi Çelebi mülkü ile ve bir tarafından zikr olunan Nesli ve Fâtıma ve Mahmud mülkü ile mahdûd olan yeri üstünde olan eşcâr-ı müsmiresiyle zikr olunan sulhdan bedel olup kabz eyledim ve müvekkileteyn-i mezbûreteynim Âişe ve Rabia nâm hatunlar mezkûrûn Nesli ve Fâtıma ve Mahmud’un zimmetlerini cemî‘ da‘vâdan ve eymân ve muhâsamâtdan husûsan bağçe-i mezbûra müte‘allik da‘vâdan ibrâ-i âmla ibrâ ve ıskāt eylediler dedikde mukırr-ı mezbûru vekîleyn-i mezbûreynden her biri bi’l-müvâcehe tasdîk edip mâ-vaka‘a bi’t-taleb kayd olundu. Şuhûdü’l-hâl: Şehide fahrü’l-akrân.