Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 206 Hüküm no: 344 Orijinal metin no: [48a-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Ahmed b. Süleyman’ın vârisinin annesi olduğu Mevlânâ Ahmed b. Mahmud el-imâm ve Ahmed b. İlyas nâm kimseler defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, mahrûse-i Bursa mahallâtından Murad mahallesinden Rukiyye Hatun bt. Mehmed kıbelinden da‘vâ ve kabza vekâleti bi-mâ hüve tarîku’s-sübût şer‘an sâbit olan Mehmed b. Mehmed’den vekâleten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müvekkile-i merkūme, mahalle-i mezbûrede sâkin iken bundan akdem mahmiye-i Tokat beldesinde Yeni Han diye ma‘rûf handa fevt olan ve muhallefâtı Beytülmâl-i mezbûr tarafından zabt edilen Pabucu büyük diye meşhûr Ahmed b. Süleyman’ın vârisidir. Şöyle ki, müdde‘iye-i merkūme, müteveffâ-yı mezkûrun annesidir. Verâseti ona münhasırdır. Ondan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim şehâdetleri mûcebince hükmetti. Bu hüküm günün kasaba-i mezkûre kādısı a‘lemü’l-ulemâi ve’l-kuzât efdalü’l-fuzalâi ve’l-vülât câmi‘u’l-fazli ma‘denü’l-kemâlât el-mahsûs bi-inâyeti’l-arzi ve’s-semâvât Emîr Hasan Çelebi kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Cerâ zâlike ve hurrire fi’l-mezbûr Şuhûdü’l-hâl: ( )