Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 214 Hüküm no: 362 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mevlânâ Gürani Mahallesi’nde annesi Hatice tarafından kendisine hibe edilen eve el konulması üzerine açılan davada evin Nisa bt. Nasuha iade edilmesi Husûs-ı kaziyyenin teftîşi bu hakīre emr olunup üzerine varıldıkda mahrûse-i Kostantiniyye’de Mevlânâ Gürâni Mahallesi’nden Nisa bt. Nasuh meclis-i şerîfe gelip anası Hadice Hatun bt. Hamza mahzarında takrîr-i da‘vâ kılup bundan akdem on iki yıl mikdârı vardır ki, mezbûr anam beni ere verdikde mahalle-i mezbûrede mezbûre anam Hadice mülkü ile ve bir tarafından Seyyid Ahmed mülkü ile ve bir tarafından Mumcu Kāsım b. Mustafa mülkü ile ve bir tarafından tarîk-i âmla mahdûd olan mülk menzilini bana hibe edip ba‘de’t-tahliye teslîm edip ben dahî tesellüm ve kabz etmiş idim. Hâliyâ mezbûr Hadice Hatun mezkûr olan eve bi-gayr-ı tarîk-i şer‘î vâzı‘u’l-yed olup benim tasarrufuma mâni‘ olur. Yed [i] ref‘ olunup benim mülküm bana teslîm olunmasın taleb ederim dedikde gıbbe’s-su’âl ba‘de’l-inkâr mezkûr Nisâ’nın sıdk-ı da‘vâsına mutâbık beyyine taleb olundukda udûl-i müslimînden mahalle-i mezbûre ahâlîsinden Abdi b. Hızır ve Şücâ Bey b. Abdullah ve Davud Paşa Mahallesi’nden Behram b. Abdullah nâm kimesneler meclis-i şer‘-i şerîfe hâzırûn olup biz şâhidleriz şehâdet dahî ederiz ki, mezbûre Hadîce Hatun mezbûre Nisâ’yı ere verdikde zikr olunan hudûd ile mahdûd olan evi mezbûre Nisâ’ya hibe ve teslîm edip ve ol dahî kabz etdi. On iki yıldır ki, mutasarrıfedir deyü edâ’-i şehâdet-i şer‘iyye etdiklerinde şehâdetleri ba‘de’t-tezkiyeti’ş-şer‘iyye ve’t-ta‘dîli’ş-şer‘î hayyiz-i kabûlde vâki‘ olup mûcebiyle hükm olundu. Tahrîren fî 8 Receb sene 965. Şuhûdü’l-hâl: el-Hâc Mehmed b. Ali, Mahmud b. Abdullah min mahalle-i Gürâni, Nâfi b. İlyas, Hasan b. Yusuf, el-Hâc Yusuf b. Abdullah, Üstâd Ahmed b. Abdullah, Hüsâm b. Ali el-muhzır