Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 220 Hüküm no: 374 Orijinal metin no: [52a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Hasan Çelebi b. Şîrmerd’in vârislerinin karısı ve dört kızı olduğu El-Hâc Musa b. Abdullah ve Dede Bâli b. Mürüvvet ve Seyyid Halil b. Seyyid Yusuf nâm kimseler defterdârlar nezdindeki dîvân-ı âlîye gelip mahmiye-i Kostantıniyye’de vâki‘ Beytülmâl-i hâs emîni fahrü’l-akrân Mehmed Çelebi b. Abdülkadir ve kâtibi Mehmed Çelebi b. Nasuh mahzarlarında, Râbia ve Sabîha bintey merhûm Hasan Çelebi kıbelinden ve Sâkine ve Fâtma bintey Hasan Çelebi’ye vesâyeti şâhideyn-i mezkûreynin şehâdeti ile sâbit olan Hadice bt. Mehmed kıbelinden da‘vâ ve kabza vekâleti şâhideyn-i mezkûreynin şehâdeti ile sâbit olan Ömer b. Mahmud’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, Sâkine, Fâtma ve Hadice bundan akdem mahrûse-i Edirne’de fevt olan ve muhallefâtı Beytülmâl-i mezbûr tarafından zabt edilen Hasan Çelebi b. Şîrmerd’in vârisleridir. Râbia ve Sabîha ve Sâkine ve Fâtma müteveffâ-yı mezbûr Hasan Çelebi’nin sulbiyye kızlarıdır. Mezbûre Hadice ise öldüğünde taht-ı nikâhında bulunduğu zevcesidir. Verâseti onlara münhasırdır. Onlardan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim şehâdetleri mûcebince hükmetti. Cerâ zâlike ve hurrire fî 10 Receb sene 965 Şuhûdü’l-hâl: Mehmed b. Nebi ve Kemal b. Turmuş ve Hamza b. Abdullah