Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 244 Hüküm no: 429 Orijinal metin no: [59a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Yusuf’un muhallefâtında yer alan evin müzâyede ile satıldığı Sülüs-i mâlıyla mahrûse-i Edirne’de Arpa Hanı mahallesinde bir mekteb binâ edilmesini vasiyet eden silahdârlar cemâ‘ati kâtibi merhûm Mehmed Çelebi b. Yusuf’un muhallefâtına vasiyy-i muhtâr olan ve ilâveten kendi bülûğuna mu‘terif olup yaşı bülûğunu mütehammil bulunan, babası, müteveffâ-yı mezkûrun kardeşi olan Hatice bt. Mustafa kıbelinden âti’z-zikr bey‘a ve kabz-ı semene vekâleti Mustafa b. Abdullah ve Pîrî b. İskender’in şehâdeti ile sâbit bulunan fahrü’l-emâsil ve’l-akrân Sinan Bey b. Üveys ve müteveffâ-yı mezbûrun zevcesi Âişe bt. Ömer kıbelinden husus-ı âti’z-zikre vekâleti Pîrî b. İskender ve Behram b. Abdulah’ın şehâdeti ile sâbit olan Mustafa b. Pîrî şöyle ikrâr ve i‘tirâf eylediler ki, vekâlet ve vesâyet-i mahkiyyeleri hasebiyle müteveffâ-ı mezbûrun muhallefâtındaki, mahmiye-i Kostantıniyye mahallâtından Bostancıbaşı mahallesinde vâki‘, dâhilî ve hâricî muvavvatalı, muhavvata-i dâhiliyesi, üzerinde oda bulunan tahtânî bir hâneyi, bahçeyi, tahtânî dört hâneyi, sofayı, üzerinde sofa bulunan serdâbı, önünde bahçe bulunan siğer bir sofayı, su kuyusunu, iki fırını, hamamı, mutfağı, mahzeni, bahçenin karşısında bulunan kasrı, üzerinde sofa, kiler ve mutfak bulunan tahtânî iki hâneyi, tahtânî diğer iki hâneyi, fiskıyeyi, müte‘addid helâyı müştemildir; muhavvata-i hâriciyesi, kasrı, önlerinde sofa, altında iki oda bulunan iki hâneyi, önlerinde sofa bulunan diğer tahtânî iki hâneyi, ahırı, anbarı, mutfağı, fiskıyeyi, beş odayı, diğer bir hâneyi, müte‘addid helâyı müştemildir, bir tarafından Sinan b. Abdullah mülkü, bir tarafından Nasuh Çelebi mülkü, bir tarafından dâr-ı ta‘lîm ile mahdûd bulunan cemî‘ menzili yüz otuz beş bin akçe semen-i mu‘ayyen-i makbuz ile kıdvetü’l-ekârim ve’l-e‘ânî menba‘ü’l-mekârimi’l-me‘âlî, atebe-i aliyye-i sultâniyede kapıcılar cemâ‘ati kâtibi olan Mehmed Çelebi b. Hüseyin’e bey‘ eylediler. O da her ikisinden menzil-i mezkûru iştirâ eyledi. Vâki‘ ikrâr, müşterî-yi mezbûr kıbelinden tasdîka vekâleti Mahmud Çelebi b. Ahmed ve el-Hâc Mehmed’in şehâdeti ile sâbit olan Hasan Bey b. Abdullah tarafından bi’l-müvâcehe tasdîk edildi. İşbu mubâya‘a mebî‘-i merkūmun mecâlis-i tâlibîn ve mehâfil-i râgibîne arzı ve semenin karar kılmasından ve ehl-i hibre ve ehl-i vukūfun semenin semen-i emsâl olduğunu haber vermelerinden sonra vukū‘ buldu. Cerâ zâlike fî evâhiri Receb sene 965 [59b] Şuhûdü’l-hâl: Fahrü’l-müderrisîn Mahmud Çelebi b. Ahmed, Mustafa b. Abdullah, Davud b. Abdullah, Süleyman b. Yusuf, Ferhad b. Abdullah, el-Hâc Ferhad el-mismârî, Hasan Ağa b. Abdullah el-mütevellî, Fahreddin ed-dellâl, Mehmed ed-dellâl, Mehmed b. Uğurlu, Ömer b. Abdullah el-bevvâb, Ahmed b. Abdullah el-bevvâb, Fahreddin sarrâf ve gayruhüm