Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 246 Hüküm no: 434 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirne’de vefat eden Mehmed Çelebi b. Yusuf’un mektep yapımı için parasını vakf etmesi Sâbıkā silâhdârlar kâtibi olup Mahmiye-i Edirne’de vefât eden merhûm Mehmed Çelebi b. Yusuf Evkāfı mütevellîsi olan Behram b. Abdullah nâm kimesne şer‘-i şerîf-i nebevîde işbu hâmilü’l-kitâb müteveffâ-yı merkūmun vasiyy-i muhtârı olup Sinan Bey b. Üveys mahzarında ikrâr ve takrîr-i kelâm kılıp dedi ki, merhûm-ı mezkûr maraz-ı mevtinde vasiyyet edip cemî‘ mâlının sülüsünden techîz ve tekfîne sarf olunandan ve ta‘yîn eylediği beş bin hac akçesinden mâ bâkī ile mahrûse-i mezbûrede bir mekteb binâ olunup ziyâde ne kalırsa mesâlih-i mekteb-i mezbûr için vakf olup mu‘âmele-i şer‘iyye olunmasını şart eylemiş idi. Hâliyâ techîzinden ve tekfîninden ve hac akçesinden gayrı yetmiş bin akçe ziyâde kalup yirmi bin akçesi ber vech-i tahmîn binâ-i mekteb-i mezbûr içün ve elli bin akçesi ber-vech-i mezkûr vakf olmak için işbu sâlifü’z-zikr vasiyy-i muhtâr olan Sinan Bey yedinden bî kusûr alıp kabz eyledim. Üzerinde bir akçe ve bir habbe kalmamışdır dediğinde mukırr-ı mezbûru vasiyy-i mezkûr vicâhen ve şifâhen tasdîk eylediği gıbbe’t-taleb ketb olundu. Fî evâ’il-i Şa‘bân sene 965.