Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 247 Hüküm no: 437 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasından intikal edip haksız yere satılmak istenen tarla ve bağ hisselerinin Derviş Çelebi b. Mehmed ile diğer kardeşlerine iadesi Sebeb-i tahrîr-i hurûf oldur ki, Derviş Çelebi b. Mehmed nâm kimesne meclis-i şer‘de karındaşı İbrâhim Çelebi b. Mehmed el-mezbûr mahzarında takrîr-i da‘vâ kılıp bundan akdem merhûm babam Mehmed el-mezbûr fevt oldukda kazâ-i havâss-ı Kostantiniyye’de tevâbi‘inden Yaraşcı? nâm karyede vâki‘ olup bir tarafdan Lütfi Bey veresesi mülkü ile ve etrâf-ı selâsesinden tarîk-i âmla mahdûd olan çiftliği ve beyne cîrânihâ ma‘lûm ve meşhûr olmağla tahdîdden müstağnî olan bir bağı ve on beş kıt‘a tarlaları irs-i şer‘ile bana ve mezbûr İbrâhim’e ve karındaşım Derviş Çelebi ve Osman Çelebi’ye ve karındaşım Fahri’ye intikāl etmiş idi. Mezbûr İbrâhim Çelebi zikr olunan çiftliğe ve bağa ve tarlalara vâzı‘u’l-yed olup bi-gayr-ı tarîk-i şer‘î benim sehm-i şâyi‘amı tasarrufa mâni‘ olur bunun yediyle mesfûr İbrâhim Çelebi zikr olunan çiftlikden ve bağdan ve tarlalardan sehm-i şâyi‘ayı Mustafa Çelebi b. Mehmed nâm kimesneye satar oldukda meclis-i şer‘de on bir sehmde iki sehm benimdir. Bâkīsi sâir karındaşlarımla kız karındaşımındır. Babamızdan irsle intikāl etmişdir deyü ikrâr ve i‘tirâf etdiğine şâhidlerimiz vardır denildikde gıbbe’s-su’âl ve’l-inkâr müdde‘î-i mezbûrun sıdk-ı makāline mutâbık beyyine taleb olundukda udûl-i müslimînden Mehmed b. Bâlî ve Hüseyin b. Hamza nâm kimesneler li-ecli’ş-şehâde hâzırûn olup biz şâhidleriz ve şehâdet dahî ederiz ki, mezbûr İbrâhim Çelebi zikr olunan çiftlikden ve bağdan ve tarlalardan sehm-i şâyi‘ini mezbûr Mustafa Çelebi’ye satar oldukda on bir sehmden iki sehm benimdir. Mâ‘adâsı zikr olunan karındaşlarımla kız karındaşımındır. Babamızdan irsle intikāl etmişdir deyip ikrâr ve i‘tirâf etdi deyü edâ’-i şehâdet-i şer‘iyye eylediklerinde şehâdetleri ba‘de’t-ta‘dîli’ş-şer‘î makbûl olup hükm olundu. Şuhûdü’l-hâl: Ali b. Halil, Hızır b. İlyas, Mehmed b. Yusuf, Muharrem b. Hüseyin ve gayr [ühüm].