Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 249 Hüküm no: 442 Orijinal metin no: [61b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Kara Ahmed b. Yusuf’un vârislerinin iki oğlu ve karısı olduğu Fahrü’l-a‘yân Mehmed Çelebi b. Mevlânâ Bâli ve Derviş b. Hüseyin nâm kimseler defterdârlar nezdindeki dîvân-ı âlîye gelip, emîn-i Beytülmâl ve kâtibi mahzarında, sipâhî oğlanları cemâ‘atinden olup bundan akdem fevt olan ve muhallefâtı Beytülmâl-i mezbûr tarafından zabt edilen Kara Ahmed b. Yusuf oğlu Ali’den kendi nefsinden asâleten, Mehmed b. Ahmed nâm sagīre kıbel-i şer‘den mansûb vasî olarak vesâyeten ve müteveffâ-yı mezbûrun zevcesi Hasnâ bt. Şücâ‘ kıbelinden vekâleti şâhidîn-i mezbûrînin şehâdeti ile sâbit olarak vekâleten sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezbûr Ali, müteveffâ-yı mezkûr Ahmed’in sulbî oğludur. Verâseti ona ve sagīr-i mezbûr oğlu Mehmed’e ve öldüğünde taht-ı nikâhında bulunan zevcesi mesfûre Hasnâ’ya münhasırdır. Onlardan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-tezkiyeti’ş-şer‘iyye hâkim şehâdetleri mûcebince hükmetti. Fî evâsıtı Şa‘bân sene 965 Şuhûdü’l-hâl: Mehmed Çelebi b. İlyas mukāta‘cı, Ahmed Çelebi b. Mevkūfâtcı ve gayruhüm