Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 255 Hüküm no: 456 Orijinal metin no: [63a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Babasından intikal edip haksız yere satılmak istenen tarla ve bağ hisselerinin Derviş b. Mehmed ile diğer kardeşlerine iadesi Sebeb-i tahrîr-i hurûf oldur ki, Derviş b. Mehmed nâm kimesne karındaşı olan Mustafa b. Mehmed mahzarında takrîr-i kelâm edip bundan akdem merhûm babam Mehmed fevt olduğunda havâss-ı Kostantıniyye tevâbi‘inden Maraşcı nâm karyede vâki‘ olup bir tarafından Lütfi Bey veresesi mülkü ile ve üç tarafı tarîk-i âmla mahdûd olan çiftliği ve beyne’l-ahâlî ma‘lûm ve meşhûr olmağla tahdîd ve ta‘yînden müstağnî olan bir kıt‘a bağı on beş zirâ‘ate sâlih tarlaları bana ve mezbûr karındaşım İbrâhim’e ve karındaşlarım Osman’a ve kız karındaşımız [a] intikāl etmişidi. Hâliyâ mezbûr karındaşımız İbrâhim zikr olunan çiftliğe ve bağa ve tarlalara vâzı‘u’l-yed olup bizim tasarrufumuza mâni‘ olur. Bunun biriyle mezbûr karındaşım İbrâhim zikr olunan çiftlikden ve bağda hisse-i şâyi‘asın Mustafa nâm [kimesneye] satar oldukda meclis-i şer‘e gelüp zikr olunan çiftlik ve bağ ve tarlalar bana vesâir karındaşlarımla kız karındaşıma intikāl etmişdir. On bir sehmde iki sehm benimdir. Mâ‘adâsı mezkûr karındaşlarımla kız karındaşımındır deyü ikrâr etmişdir hâliyâ taleb ederim dedikde gıbbe’s-su’âl ba‘de’l-inkâr mezkûrun sıdk-ı da‘vâsına mutâbık beyyine taleb olundukda udûl-i müslimînden Mehmed b. Bâlî ve Hüseyin b. Hamza müdde‘î-i mezkûrun sıdk-ı makāline mutâbık şehâdet-i şer‘iyye etdiklerinde şehâdetleri ba‘de’t-tezkiyeti’ş-şer‘iyye hayyiz-i kabûlde vâki‘ olup mâ-vaka‘a bi’t-taleb kayd olundu. Fi [‘t-târîhi]’l-mezbûr. Şuhûdü’l-hâl: Ahmed b. Süleyman, Hüseyin b. Ali, Mehmed Çelebi b. Süleyman, Ahmed Çelebi b. Mehmed.