Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 262 Hüküm no: 470 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Oturduğu ev Kasım Paşa Evkafı’na ait olan Hatice bt. Karaali’nin vakfa olan borcunu ödemesi Oldur ki, mahrûse-i Galata hâricinde câmi‘-i şerîfi vâki‘ olan merhûm Kāsım Paşa’nın evkāfına hâliyâ mütevellî olan Hüseyin Bey b. Sinan nâm kimesne meclis-i şer‘-i şerîfde Hadice bt. Karaali nâm hatunun kıbelinden husûs-ı âtî[ye] bi-mâ hüve tarîkü’s-sübût şer‘an vekâleti sâbit olan Mustafa b. Sinan nâm kimesne mahzarında ikrâr ve takrîr-i kelâm edip bundan akdem vakf-ı mezbûr mütevellîsi olan Mahmud Bey b. Abdullah, mezbûre Hadice’nin mahmiye-i İstanbul’da Kabasakal Mahallesi’nde vâki‘ merhûm Emir Efendi mülkü ile ve Hacı Kāsım mülkü ile ve Mehmed Çelebi mülkü ile ve tarîk-i âmla mahdûd olan mülk evini sene tis‘a ve hamsîn ve tis‘a-mi’e Rebî‘ülâhiri’nin yirmi sekizinde mâl-ı vakf ile istiğlâl tarîk üzre altı bin akçeye satın alıp târîh-i mezbûrdan bu yıla varınca altı yüz akçeye mezbûre Hadice’ye icâreye vermiş imiş. Hâliyâ zikr olunan menzili hatun-ı mezbûreye teslîm edip asl-ı mâl-ı mezbûr altı bin akçeyi ve zimmetinde bu târîhe gelince bâkī olan bin yetmiş akçe ücreti vekîl-i mezbûr yedinden alıp kabz eyledim. Mezbûr Hadice’nin zimmetinde vakf-ı mezbûr mâlından asldan ve ribhdan nesne kalmadı dedikde mukırr-ı mezbûru vekîl-i mezbûr bi’l-müvâcehe tasdîk edip mâ-vaka‘a bi’t-taleb kayd olundu. Hurrire fî 3 Ramazan sene 965. Şuhûdü’l-hâl: Ahmed b. Süleyman, Mehmed Çelebi b. Süleyman, Abdi Çelebi b. Haydar, Mustafa b. Abdullah.