Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 262 Hüküm no: 471 Orijinal metin no: [65a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamza b. Bahşı’nın, terekesi Beytülmâl tarafından zabt edilen Mustafa b. Abdullah’ta bin akçe alacağı olduğu Abdi b. Mustafa ve Hüseyin b. Ali nâm kimseler defterdârlar nezdindeki dîvân-ı âlîye gelip, emîn-i Beytülmâl ve kâtibi mahzarında, mahmiye-i Kostantıniyye mahallâtından Ördek Kasab mahallesi sükkânından Hamza b. Bahşı’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezkûrun, bundan akdem mahmiye-i merkūme mahallâtından Çakır Ağa mahallesi kurbünde vâki‘ Selman Ağa odalarında fevt olan ve muhallefâtı 19 Cumâdelâhire sene 965’de mahmiye-i mesfûre Beytülmâl emîni Haydar tahvîliyle Hızâne-i âmireye vâsıl olan Mustafa b. Abdullah’ın zimmetinde karz-ı şer‘î cihetinden bin akçe hakkı vardır. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye, hâkim, müdde‘î-yi mezbûra meblağ-ı mezkûru almadığına, hibe etmediğine, havâle etmediğine, bi-vechin mine’l-vücûh hakkının kısmen veya tamâmen sâkıt olmadığına dâir yemîn verip meblağ-ı merkūmun edâsına hükmetti. Cerâ zâlike ve hurrire fî 2 Ramazan sene 965 Şuhûdü’l-hâl: Ertoğdu b. Sinan, Hasan b. Kasım, Veli b. Abdullah