Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 265 Hüküm no: 476 Orijinal metin no: [65b-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Mustafa b. Abdullah’ın vârisinin amca oğlu Hamza olduğu Murad b. Abdullah ve Mehmed b. Abdullah el-bevvâb ve Ferhad b. Abdullah sarrâc nâm kimseler defterdârlar nezdindeki dîvân-ı âlîye gelip, emîn-i Beytülmâl ve kâtibi mahzarında, Niş kazâsı tevâbi‘inden Nikşur karyesinden Hamza b. Todora b. Pojdar’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezkûr, bundan akdem mahrûse-i Edirne’de Hâs Sarachâne diye ma‘rûf mevzi‘de fevt olan ve muhallefâtı zabt edilip emîn ve kâtib-i mezbûreyn yediyle Hızâne-i âmereye vâsıl olan Hâsbahçe huddâmından sarrâc-ı emîrî Mustafa b. Abdullah’ın usûbet-i nesebiyye cihetiyle vârisidir. Şu cihetle ki, müdde‘î-yi mezkûr, müteveffâ-yı mezkûrun ana-baba bir amca oğludur. Müteveffâ-yı mesfûr, Dimitri’nin oğludur. Dimitri de müdde‘î-yi mezkûrun ceddi olan Pojdar’ın oğludur. Verâseti ona münhasırdır. Ondan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye hâkim şehâdetleri mûcebince hükmetti. Bu hüküm günün kasaba-i mezkûre kādısı Mevlânâ Abdülkerim b. Ali kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Şuhûdü’l-hâl: Hamza b. Abdullah, Ali b. Abdullah, Mehmed b. Abdullah