Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 280 Hüküm no: 512 Orijinal metin no: [70b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Paşa Evkafı’nın Prevadi’deki câbîsi olan Câfer b. Ali’den vakıf gelirinin mütevellî tarafından teslim alındığı Kasaba-i Gekvize’de imâret-i âmiresi olan Merhûm Mustafa Paşa’nın evkāfına hâliyâ mütevellî olan fahrü’l-emâsil Muslihiddîn b. Abdullah meclis-i şer‘-i şerîfde merhûm-ı mezbûrun kazâ-i Prevadi’de vâki‘ olan evkāfına hâliyâ câbî olan Cafer b. Ali mahzarında ikrâr ve takrîr-i kelâm edip mezkûr câbînin sene selâse ve sittîn ve tis‘a-mi’ede kırk üç bin doksan yedi akçe mahsûlü olup ve mütevellî-i sâbık merhûm Ayas Bey tahvîlinden otuz bir bin üç yüz yetmiş dört akçe bâkī kalup ki cem‘an yetmiş dört bin dört yüz akçe olur. Meblağ-ı mezbûrdan zimmetinde mezkûr Prevadi’de ihrâk olunan kârbân kirâsı yetmiş bir ve dekâkîn ta‘mîrine kırk bin yedi yüz elli iki akçe ve evkāf-ı mezbûreden kasaba-i Rodoscuk’da olan hamam meremmâtına dört bin yedi yüz elli sekiz akçe ve Ahyolu’da olan hamam meremmâtına bin sekiz yüz altmış dört akçe ve Kebeceboğaz nâm mevzi‘de olan iki göz değirmenler meremmâtına sekiz yüz seksen sekiz akçe Vodina? nâm nehir üzre dâ’ir olup Karakadı Değirmenleri demekle ma‘rûf olan üç göz değirmenler meremmâtına bin sekiz yüz yirmi dokuz akçe ve ba‘z-ı ihrâcât-ı lâzımeye bin beş yüz akçe ve câbî ve kâtib vazîfeleri için iki bin sekiz yüz seksen akçe sarf olmağla cem‘an elli dört bin dört yüz yetmiş bir akçe mezbûr câbînin ma‘rifet-i hâkim ile masârifi makbûlüm olup ve yirmi bin akçeyi dahî mezkûr câbî yedinden bî kusûr alıp kabz etdim dedikde mukırr-ı merkūmu mezkûr câbî bi’l-müvâcehe tasdîk etdikden sonra câbî-i mezbûr dahî mütevellî-i mesfûr muvâcehesinde evkāf-ı mezbûr gallâtından yüz doksan üç buçuk keyl buğday ve yetmiş iki keyl şa‘îr benim zabtımdadır. Hâliyâ mütevellîye teslîm olunmamışdır deyü ikrâr etdikde mütevellî-i mezbûr dahî bi’l-müvâcehe tasdîk edip mâ-vaka‘a bi’t-taleb kayd olundu. Fi [‘t-târîhi]’l-mezbûr. Şuhûdü’l-hâl: Hüseyin b. Abdullah, Cafer b. Ali, Hüseyin b. Ali.