Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 282 Hüküm no: 514 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cemile bt. Şirmerd’in vefat eden yeğeni Nisa Hatun’un muhallefâtından sulh yoluyla pay alması Cemile bt. Şîrmerd nâm hatun kıbelinden Mahmud b. Hasan ve Süleyman b. Abdullah şehâdetleriyle vekâlet-i mutlakası sâbit olan Behram b. Abdullah ve Hüseyin b. Hüseyin nâm kimesne kıbelinden Kāsım b. Abdullah ve Derviş b. Mehmed nâm kimesneler şehâdetleriyle vekâlete sâbit olan Mehmed b. Mustafa mahzarında ikrâr ve takrîr-i kelâm edip bundan akdem mezkûr Cemile’nin kız karındaşı Şâh Hûbân Hatun’un sulbiyye kızı ve mezkûr Hasan’ın vâlidesi olan Nisâ Hatun fevt oldukda mezkûre Şâh Hûbân mezbûre Nisâ’nın metrûkâtına vâzı‘atü’l-yed olmağın ba‘dehû mezbûre Şâh Hûbân fevt olıcak mezkûr Hasan dahî mezbûre muhallefâtından ba‘zısını kabz etdiği eclden müvekkiletim mezbûre Cemile ile mâ-beynlerinde münâza‘ât-ı kesîre ve muhâsamât-ı şedîde vâki‘ olmuş idi. Hâliyâ mezkûre müvekkiletim zikr olunan da‘vâsına yedi bin akçeye sulh edip ve bedel-i sulh olan meblağ-ı mezbûru bî kusûr alıp kabz eyledi deyü ikrâr etdikde mukırr-ı mezbûr[u] vekîl-i mezbûr bi’l-müvâcehe tasdîk edip mâ-vaka‘a bi’t-taleb kayd olundu. Şuhûdü’l-hâl: Lütfi b. Kemâl, Mehmed b. Musa el-müezzin, Mehmed Çelebi b. Süleyman, Mustafa Çelebi b. İbrâhim.