Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 287 Hüküm no: 525 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hızır b. Receb ile Muharrem b. Yunus ve oğlu Hasan’ın aralarındaki alacak dâvasından vazgeçtikleri Kasab Muharrem b. Yunus ve oğlu Hasan nâm kimesneler meclis-i şer‘-i şerîfde Hızır b. Receb kıbelinden ber-vech-i âtî ibrâya, ikrâra ve gayrı husûsa vekîl olup ve vekâleti mevlânâ Mûsâ Halîfe b. Emre ve Hacı Musa b. Abdullah nâm kimesneler şehâdetleriyle sâbit olan Mevlânâ İbrâhim Çelebi b. Yakub mahzarında ikrâr ve takrîr-i kelâm edip eytdiler ki, bundan akdem mezkûr Hızır’ın babası Receb’e yirmi yıl ve kendüye yirmi üç yıl kasablık hizmetin edip mezbûrdan ecr-i misl kırk bin akçe taleb etmeğin mâ-beynimizde münâza‘ât-ı kesîre ve muhâsamât-ı şedîde vâki‘ olmuşidi. Hâliyâ mezkûr Hızır’ın zimmetini cemî‘ da‘vâdan ve eymân ve muhâsamâtdan husûsen ücret-i mezkûreye müte‘allik da‘vâdan ibrâ-i âmla ibrâ ve ıskāt eyledik dediklerinde mezkûr İbrâhim Çelebi dahî mukırrân-ı mezbûrân muvâcehesinde ikrâr ve takrîr-i kelâm edip sâbıkā mezbûr Hasan mesfûr müvekkilim Kili Kâdılığı’nda olan mandrasını içinde olan davarlarıyla bey‘ etmiş ve zikr olunan Muharrem mahmiye-i Kostantiniyye Yedikule kapısı hâricinde olan selhhânede üç mumhâneyi ve bir çayırı ve mevzi‘-i mezkûrda bir tarafı sâhil-i bahr ile ve bir tarafı tarîk-i âm ile ve bir tarafı Hacı Mustafa ve bir tarafı Küçük Hasan mülkü ile mahdûd olan sabunhâne elli bin akçeye bey‘ edip ve mahmiye-i mezbûrede Akseki Mahallesi’nde bir tarafından Hanım Hatun ve bir tarafından Ahmed Bey ve bir tarafından Zâhide bt. Mehmed ve iki tarafından tarîk-i âm ile mahdûd olan mülk menzilini yüz otuz bin akçeye bey‘ edip mezkûr menzilin derkine? oğlu mezkûr Hasan kefîl ve mukırrân-ı mezkûrân mezkûr Müvekkilimden kırk iki bin altı yüz kırk akçe karz etmişlerimiş. Zikr olunan mandrada ta‘yîn olunan davarlar eksik gelip ve zikr olunan sabunhâne Ayasofya Evkāfı’ndan olup ve zikr olunan menzilin ba‘zısı müstahık çıkmağın mezkûr Receb’in hatunu müstahık çıkmağın vekâletim hükmü ile müvekkilim mezkûr Hızır, mezbûrlarda olan hukūkun ve meblağ-ı mezbûru taleb etmiş idim. Hâliyâ müvekkilim mezbûr Hızır mezbûrlar zimmetini cemî‘ da‘vâdan ve eymân ve muhâsamâtdan husûsan mezkûr mandraya ve sabunhâneye ve menzile ve meblağ-ı mezbûra müte‘allik da‘vâdan ibrâ-i âmla ibrâ ve ıskāt eyledi dedikde mukırrûn-ı mezbûrûndan her biri âharı bi’l-müvâcehe tasdîk etdiklerinde mâ-vaka‘a bi’t-taleb kayd olundu. Fî 26 sene 965.