Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 288 Hüküm no: 527 Orijinal metin no: [73a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çakır b. Abdullah isimli yeniçerinin köle davasında Sinan Ağa b. Abdullah’ın zimmetini ibrâ ettiği Yetmiş dokuzuncu bölükden Çakır b. Abdullah nâm yeniçeri meclis-i şer‘-i şerîfde Sinan Ağa b. Abdullah tarafından husûs-ı âtîye vekîl-i mutlak olup ve vekâleti Mevlânâ Mahmûd b. Zekeriyyâ oğlu Çelebi b. Bâlî Subaşı nâm kimesne şehâdetiyle sâbit olan İbrâhim b. Halil nâm kimesne mahzarında ikrâr ve takrîr-i kelâm edip bundan akdem mezkûr Sinan Ağa’dan gökgözlü uzun boylu sarısız Macariyyü’l-asl Hüsrev nâm oğlanı benim kulumdur mezkûr ağaya emânet kodum deyü da‘vâ etmeğin mâ-beynimizde münâza‘ât-ı kesîre ve muhâsamât-ı şedîde vâki‘ olmuş idi. Hâliyâ mezkûr ağanın zimmetini cemî‘ de‘âvîden ve eymân ve muhâsamâtdan husûsan gulâm-ı mezkûra müte‘allik da‘vâdan ibrâ-i âmla ibrâ, ıskāt eyledim dedikde mukırr-ı mezbûru mukarrun-leh-i mezbûr bi’l-müvâcehe tasdîk etdikde mâ-vaka‘a bi’t-taleb kayd olundu. Fi [‘t-târîhi]’l-mezbûr. Şuhûdü’l-hâl: Hasan b. İskender er-Râcil, Hasan b. Mehmed, Mustafa b. Abdullah er-Râcil.