Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 288 Hüküm no: 528 Orijinal metin no: [73a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahbusta iken ölen Cani v. Dimoni’nin gemideki hissesinin de satılıp bedelinin beytülmâl emini tarafından teslim alındığı Mahrûse-i Galata’da ve tevâbi‘inde hâliyâ Beytü’l-mâl-ı âmme emîni olan Mehmed Çelebi b. Ali nâm kimesne meclis-i şer‘-i şerîfde Yani v. Yorgi nâm re’îs mahzarında ikrâr ve takrîr-i kelâm edip bundan akdem Mahmiye-i İstanbul zindanında mahbûs iken fevt olup Galata tevâbi‘inde bulunan muhallefâtı beytü’l-mâl-ı mezkûre [tarafından] zabt olunan Cani v. Dimoni nâm Nasrânî mezkûr re’îs ile yirmi üç zirâ‘ tûlü olan gemide şerîk olmağın mezkûr re’îsden nısf hissesini taleb etdiğimde ancak rub‘ hissesi vardır mâ‘adâsı benimdir deyü inkâr edicek ziyâde isbâta beyyineden âciz olduğumda yemîn iltimâs edip mezkûr Yani rub‘dan gayrı hakkı yok idüğüne yemîn-i şer‘î etdikde zikr olunan rub‘ hisse beyne’t-tâlibîn ve’r-râgıbîn müzâyede olundukda üç bin beş yüz akçede mukarrer olıcak zikr olunan hisse-i meblağ-ı mezbûr Kiryako b. Manol nâm zimmîye bey‘ edip semen-i mezbûru mezkûr zimmîden bî kusûr alıp kabz eyledim dedikde mukırr-ı mezbûru mezkûrân Yani ve Manol’dan her biri bi’l-müvâcehe tasdîk etdiklerinde mâ-vaka‘a bi’t-taleb kayd olundu. Fî 28 min-Şevvâl sene 965. Şuhûdü’l-hâl: Hasan b. Ahmed, el-Hâc Abdullah b. Abdullah, Kāsım b. Abdullah, Pîrî b. Abdullah, Behram b. Abdullah, Topcubaşı.