Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 306 Hüküm no: 564 Orijinal metin no: [78a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Habibe bt. Abdullah’ın evini vakfettiği Sâhibetü’l-hayrât Habibe bt. Abdullah meclis-i şer‘a hazıra olup işbu ikrârın kendisinden sudûruna kadar mâliki olduğu ve taht-ı tasarrufunda bulundurduğu, mahmiye-i Kostantıniyye mahallâtından Nuri Dede mahallesinde kâin, tahtânî iki hâneyi, serdâbı, gölgeliği, su kuyusunu, üzerinde oda bulunan ahırı, bahçeyi ve avluyu hâvî, bir tarafından Fâtma Hatun bt. Ahmed Çelebi mülkü, bir tarafından Mustafa b. Abdullah mülkü, tarafeynden de tarîk-ı âm ile mahdûd bulunan menzilini cümle hudûdu ve kâffe-i hukukuyla habsedip vakfetti. Süknâyı, müddet-i hayâtınca evvelâ kendi nefsine, sonra Fâtma bt. Abdullah nâm kızına ve utekāsından Ahmed b. Abdullah’a ve Keyvan b. Abdullah’a ve Şirin bt. Abdullah’a bi’s-seviyye beynehüm şart etti. Sonra zükûr ve inâsdan evlâdına, evlâd-ı evlâdına batnen ba‘de batnin ile’l-inkırâz şart eyledi. Sonra vâkıfe-i mezbûrenin rûhuna her gün üç kere sûre-i İhlâsı, bir kere sûre-i Fâtiha’yı okumak üzere ehl-i ilimden ve sulehâdan bir kimseye şart etti. Menzil-i mezkûrun meremmetini sâkinlerine şart etti. Mahalle-i mezbûre ahâlîsini hasbî nâzır nasbetti. Sonra menzil-i merkūmu, tescîl maksadıyla mütevellî nasbettiği el-Hâc Davud b. Veli’ye teslîm etti. O dahî kabz ve tesellüm eyledi. Hâl bu minvâl üzere iken vâkıfe-i mezbûre İmâm-ı A‘zam Ebû Hanîfe Nu‘mân b. Sâbit katında vakf akārın lüzûmu olmamağın vakf-ı mezbûrdan rücû‘ eyledim ve silk-i mülküme kemâ kân idhâl edip mütevellî-i mezbûrdan istircâ‘ ve istirdâd eyledim deyip menzili geri istedi. Mütevellî-yi mezbûr cevâbında imâmeyn-i hümâmeyn Ebû Yûsuf ve Muhammed Şeybânî katlarında akārda lüzum-ı vakf muhakkaktır diye hâkim-i mûmâ-ileyh den hükm taleb etdikde sıhhat-i vakf-ı akārda imâmeyn kavli akvâ ve ma‘mûlün-bih olmak mâ-aleyhi’l-fetvâ olmağın e’imme-i eşrâf beyninde olan ihtilâfı da bilerek cânib-i lüzûm-ı vakfı ihtiyâr edip sıhhat-i vakfa hükmetti. el-Âyetü. Şuhûdü’l-hâl: Mehmed b. Abdullah, Ali b. Abdullah, Yahya b. el-Hâc Mustafa, Hamza b. İskender, Mustafa b. Yahya, Şücâ‘ b. Abdullah, Mehmed b. Mahmud, Ramazan şerbetî, Sinan b. Abdullah