Balat Mahkemesi 1 Numaralı Sicil (H. 964-965/ M. 1557-1558) cilt: 41, sayfa: 306 Hüküm no: 565 Orijinal metin no: [78b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmâl tarafından zabt edilen Hûbân bt. Hamza’nın vârisinin amca oğlu İsa olduğu Ahmed b. İsmail ve Kasım b. Yusuf nâm kimseler defterdârlar nezdindeki dîvân-ı âlîye gelip, emîn-i Beytülmâl ve kâtibi mahzarında, vilâyet-i Anadolu-i ma‘mûre’de vâki‘ kazâ-yı Kandıra tevâbi‘inden Depecik-i vîrân karyesi ahâlîsinden İsa b. Mahmud’dan sâdır olan da‘vâ-yı sahîha-i şer‘iyyede gıbbe’l-istişhâd şöyle şehâdet eylediler ki, müdde‘î-yi mezkûr, aslen karye-i mezbûre sükkânından olup mahrûse-i hâric-i Galata’daki Mevlânâ Serverî Çelebi Efendi mahallesinde sâkine iken fevt olan ve muhallefâtı zeylde mastûr senenin Şa‘bân ayının on yedinci günü Galata-i mezbûre Beytülmâl emîni Mehmed Çelebi yediyle Hızâne-i âmire’ye vâsıl olan Hûbân bt. Hamza b. Mahmud’un vârisidir. Şu cihetle ki, müdde‘î-yi mezkûr, müteveffât-ı merkūmenin ana-baba bir amca oğludur. Şöyle ki babası Hamza b. Mahmud’dur ki o da müdde‘î-yi mezkûrun ana-baba bir karındaşıdır. Verâseti ona münhasırdır. Ondan gayrı vârisi ma‘lûmumuz değildir. Şehâdeten sahîhaten şer‘iyyeten makbûleten ba‘de’t-ta‘dîli’ş-şer‘î ve’t-tezkiyeti’ş-şer‘iyye hâkim şehâdetleri mûcebince hükmetti. Bu hüküm günün kasaba-i mezkûre kādısı Mevlânâ Sa‘dî b. Tayyib kıbelinden verilmiş ve mazmûnu bi-mâ hüve tarîku’s-sübût şer‘an sâbit ve kaziyye-i mezkûreye mutâbık kitâb-ı hükmînin ibrâzıyla verildi. Cerâ zâlike ve hurrire fî 26 Zilka‘de sene 965 Şuhûdü’l-hâl: Âşir b. İsa, Sefer b. Ali