Beşiktaş Mahkemesi 2 Numaralı Sicil (H. 966-968 / M. 1558-1561) cilt: 42, sayfa: 180 Hüküm no: 331 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yakomi b. Kosta’nın küçük çocuklarının, ölen eski vasileri Todora b. Simo’nun karısı Zanbeta b. Yorgi zimmetinde 2.250 akçe alacakları olduğu Yevmü’s-sülâsâ, fî 6 Vech-i tahrîr-i sicil oldur ki Kuruçeşme nâm karyede fevt olan Yakomi b. Kosta nâm Nasrânînin eytâmı Andon ve Dimitri ve Zanbiya nâm sagīrelere kıbel-i şer‘den vasî nasb olunan Kostantin b. Yorgi nâm Nasrânî karye-i mezbûreden eytâm-ı mezkûrûna sâbıkā kıbel-i şer‘den vasî nasb olunup fevt olan Todora b. Simo’nun zevcesi Zanbeta bt. Yorgi nâm zimmiyeyi mahfil-i şer‘-i şerîfe ihzâr ve üzerine takrîr-i da‘vâ kılıp sâbıkā eytâma vasî olan Todora fevt oldukda üzerine varıp eytâm-ı mezkûrûnun iki bin iki yüz elli akçelerini işbu müşârun-ileyhâ Zanbeta’dan suâl etdikde ikrâr edip ol iki bin iki yüz elli akçeyi benden almış birkaç gün bana mehil ver tahsîl edip vereyin demiş idi hâliyâ meblağ-ı mezkûreyi vesâyetim tarîki ile mezbûreden taleb ederim dedikde gıbbe’s-suâl mezbûre Zanbeta inkâr ile cevâb verip meblağ-ı mezkûr fevt olan zevcim muhallefâtıyla beytü’l-mâlci alıp zabt etdi dedikde müdde‘î-i mezbûrun da‘vâsına mutâbık beyyine taleb olundukda karye-i mezbûreden Kethüdâ İstemad b. Dimitri ve Yako b. Yorgi ve Simo b. Yani ve Todora b. Dimitri ve Katarina bt. Kosta nâm zimmîler müdde‘î-i mezbûrun sıdk-ı da‘vâsına mutâbık edâ-i şehâdet-i şer‘iyye edip işbu müşârun-ileyh Kostantin işbu müşârun-ileyhâ Zanbeta’dan iki bin iki yüz elli akçe Yakomi eytâmının akçesidir suâl etdikde ikrâr edip meblağ-ı mezkûr benden …? birkaç gün bana mehil ver tahsîl edip vereyin dedikde ve akçeyi beytü’l-mâlci kabz etmeyip mezbûrenin zimmetinde idiğine sâbıkā bu kimesneyi şâhid etdiğine şâhidleriz şehâdet dahi eyleriz dediklerinde mezkûrların şehâdetleri ba‘de’t-tezkiyye hayyiz-i kabûlde vâki‘ oldukdan sonra mezbûre Zanbeta vicâhen ikrâr etdiği vukū‘u üzere mezbûr vasî talebiyle kayd-ı sicil olundu. Tahrîren fi’l-yevmi’s-sâdis min şehri Recebi’l-mürecceb li-sene seb‘a ve sittîn ve tis‘a mi’e. Şuhûd: Hüsam b. Nebî el-muhzır, Mustafa b. Abdullah el-muhzır, Petro b. Dimitri, Yani b. Dimitri, Ramazan b. Mahmud ve gayruhüm mine’l-hâzırîn.