.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 176
Hüküm no: 135
Orijinal metin no: [32a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Zâhide bt. Abdullah’ın ev hissesini kocası Mahmud Çelebi b. Mehmed’e hibe ettiği

Mahmiye-i İstanbul’da Abdi Çelebi mahallesinde sâkine olup zâtı ma‘rifet-i şer‘iyye ile ârifân İmâm Mehmed Efendi b. Osman ve Müezzin Mehmed Halîfe b. Emrullah nâm kimesneler ta‘rîfleriyle mu‘arrefe olan Zâhide bt. Abdullah nâm hâtun meclis-i şer‘-i hatîr-i lâzımü’t-tevkīrde işbu bâ‘is-i hâze’l-kitâb zevci Mahmud Çelebi b. Mehmed nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan balıkçı Mustafa ve bir tarafdan Ahmed Bey menzili ve iki tarafdan tarîk-i âm ile mahdûd olup fevkānî iki bâb oda ve bir sofa ve bir matbah ve tahtânî iki bâb oda ve kenîfi ve su kuyusunu ve havluyu müştemil menzilde olan üç sehimden bir sehim hissemi zevcim mezbûr Mahmud Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile yüz kıt‘a esedî guruşa bey‘ ve teslîm ol dahi ber vech-i muharrer iştirâ ve tesellüm eylediğinden sonra semeni olan meblağ-ı mezbûr yüz esedî guruşu mezbûr Mahmud Çelebi’ye hibe-i sahîha-i şer‘iyye ile hibe ve temlîk edip ol dahi meclis-i hibede ittihâb ve kabûl eyledi ba‘de’l-yevm menzil-i mahdûd-ı mezkûrun üç sehimden hissem olan bir sehm-i şâyi‘ mezbûr Mahmud Çelebi’nin mülk-i müşterâsıdır, keyfe mâ yeşâ’ ve yahtâr [32b] mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis [min] Saferi’l-hayr li sene seb‘a ve semânîn ve elf.


Şuhûdü’l-hâl: Ahmed Çelebi b. Derviş, İvaz Efendi b. Şaban, Kefeli Mustafa Bey, İbrahim Çelebi b. Mehmed, Abdülkerim Çelebi b. Ali, Mustafa Çelebi b. Nasûh, Mehmed Çelebi b. Ali, el-Hâc Kemaleddin Kethüdâ-yı Hazret-i Efendi, Hazînedâr el-Hâc Hüseyin Ağa ve gayruhüm mine’l-hâzırîn.