.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 177
Hüküm no: 136
Orijinal metin no: [32b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İbrahim Beşe b. Mahmud’un keresteci el-Hâc Mustafa b. Abdullah’a olan borcunu ödemesi gerektiği

Keresteci tâ’ifesinden olup mahmiye-i İstanbul’da Çerağī Hamza mahallesi sâkinlerinden bâ‘is-i hâze’l-kitâb el-Hâc Mustafa b. Abdullah nâm kimesne meclis-i şer‘-i şerîfde İbrahim Beşe b. Mahmud nâm kimesne mahzarında üzerine da‘vâ ve takrîr-i kelâm edip mezbûr İbrahim Beşe zimmetinde yedimden iştirâ ve kabz eylediği beynimizde ma‘lûm kereste bahâ[sından] ba‘de küllî hesâb on bin yüz yedi akçe hakkım olup hattâ şuhûd mahzarında ikrâr dahi ettiğinden sonra meblağ-ı mezbûrun dört bin akçesini mezbûr İbrahim Beşe bana edâ ve teslîm ben dahi ahz u kabz edip altı bin yüz yedi akçe bâkī kalmış idi hâlâ mezbûr İbrahim Beşe’ye suâl olunup meblağ-ı bâkī-i mezbûru bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda tâ’ife-i mezbûreden olup mahmiye-i mezbûrede Murad Paşa türbesi kurbunda Camcı mahallesi sâkinlerinden Mehmed Efendi b. Mehmed ve Hüseyin Ağa mahalle[si] sâkinlerinden Süleyman b. Mustafa nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr İbrahim Beşe müdde‘î-i mezbûr yedinden iştirâ ve kabz eylediği kereste bahâsından ba‘de küllî hesâb zimmetinde müdde‘î-i mezbûr el-Hâc Mustafa’ya vâcibü’l-edâ ve lâzımü’l-kazâ on bin yüz yedi akçe deyni olduğu[nu] bizim huzûrumuzda ikrâr ve bizi istişhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘den irsâl olunan Mevlânâ es-Seyyid Muharrem Efendi b. es-Seyyid İsmail evvelâ zikr olunan Camcı mahallesine varıp ahâlîsinden Şeyh Yahya Efendi b. Mustafa ve Ömer Çelebi b. Abdullah ve Hasan Bey b. Hamza ve Mustafa Beşe b. Ali ve Mehmed Efendi b. İsmail ve Receb b. Yusuf ve Mehmed Efendi b. Yusuf nâm kimesnelerden şâhid-i mezbûr Mehmed Efendi’nin keyfiyyet-i hâlini suâl edip ve sâniyen zikr olunan Hüseyin Ağa mahallesine varıp ahâlîsinden Ömer Çelebi b. Süleyman ve el-Hâc Mümin b. Halil ve Hasan b. Mustafa ve Abdi Çelebi b. Ali ve Mehmed Çelebi b. Hüseyin ve Ali Dede b. Mustafa ve Mehmed Beşe b. Hüseyin ve Halil Çelebi b. Abdullah nâm kimesnelerden mezbûr Süleyman’ı suâl eyledikde her biri şâhidân-ı mezbûrân için adl ve makbûlü’ş-şehâdedir velev aleynâ deyû haber verdiklerini Mevlânâ-yı mezbûr mahallinde tahrîr ve ma‘an irsâl olunan Mehmed b. Ahmed ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve’t-tezkiyye olundukdan sonra şehâdetleri makbûle olmağın mûcebince meblağ-ı bâkī-i mezbûr altı bin yüz yedi akçeyi müdde‘î-i merkūma edâ ve teslîme mezbûr İbrahim Beşe’ye tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene seb‘a ve semânîn ve elf.


Şuhûdü’l-hâl: El-Hâc Abdurrahman b. Musa, Musa Halîfe b. Receb, el-Hâc Kasım b. Receb, Mustafa Beşe b. Abdullah, ve Hasan Beşe çukadâr ve gayruhüm.