|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 178 Hüküm no: 137 Orijinal metin no: [32b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Ali Çavuş b. Abdullah’ın borcunun terekesini alan kardeşi Mustafa’dan tahsil edildiği
Mahmiye-i İstanbul’da bi’l-fi‘l beytülmâl emîni olan umdetü’l-emâsil ve’l-emâcid Mustafa Ağa b. Mehmed Ağa tarafından husûs-ı âti’l-beyâna vekîl olduğu Ömer Çavuş b. İbrahim ve Fazlullah Çelebi b. Mehmed nâm kimesneler şehâdetleri ile şer‘an sâbit olan Ahmed Ağa b. Mustafa nâm kimesne meclis-i şer‘-i şerîfde mahmiye-i mezbûrede Haydarhâne mahallesinde sâkin iken bundan akdem vefât eden Ali Çavuş b. Abdullah nâm kimesnenin li ebeveyn karındaşı olup ve hasren vârisi olmağla terekesine vâzı‘ü’l-yed olan bâ‘is-i hâze’l-kitâb diğer Mustafa Bey nâm kimesne mahzarında bi’l-vekâle ikrâr ve takrîr-i kelâm edip müvekkilim mûmâ-ileyh kendi malından müteveffâ-yı mezbûra hayâtında bin seksen beş senesi evâsıtında bin üç yüz elli guruş ikrâz ve teslîm ol dahi iktirâz ve kabz ettiğinden sonra müteveffâ-yı mezbûr hayâtında meblağ-ı mezbûrun bi’d-defe‘ât bin yüz elli yedi guruşunu müvekkil-i mûmâ-ileyhe edâ ve teslîm ol dahi yedinden ahz u kabz ve istîfâ etmiş idi bâkīsin yüz doksan üç guruş müteveffâ-yı mezbûrun zimmetinde iken kable’l-edâ fevt olmağla hâlâ merkūm diğer Mustafa’dan meblağ-ı bâkī-i mezbûr yüz doksan üç guruşu müteveffâ-yı mezbûrun tereke-i vâfiyesinden da‘vâ ve taleb ettiğinde, ol dahi edâdan imtinâ‘ etmeğin beynlerinde nizâ‘-ı küllî vukū‘undan sonra muslihûn tavassut edip mezbûr diğer Mustafa ile müvekkil-i mûmâ-ileyh beynlerinde yüz guruş üzerine inşâ-i akd-i sulh ettiklerinde müvekkil-i mezbûr dahi sulh-i mezbûru kabûl ve bedel-i sulh olan meblağ-ı mezbûr yüz esedî guruş mezbûr diğer Mustafa yedinden tamâmen ahz u kabz eyledi ba‘de’l-yevm tereke-i mezbûre ve husûs-ı [33a] mezbûra müte‘allika âmme-i de‘âvâdan mezbûr diğer Mustafa’nın zimmetini ibrâ-i âmm-ı râfi‘ü’l-hisâm ile ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf.
Şuhûdü’l-hâl: Ömer Çavuş b. Mehmed Çavuş b. Fazlı Ağa b. ( ), İsmail Çelebi b. Haydar, el-Hâc Mustafa b. Mahmud, Mahmud Çelebi b. Ali ve gayruhüm.
|