.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 179
Hüküm no: 138
Orijinal metin no: [33a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Osman b. el-Hâc İbrahim’in terekesinden kızı Ayşe Hâtun’un payına düşen parayı, ablası Kerime Hâtun’dan aldığı

Fi’l-asl vilâyet-i Anadolu’da Devrekâni kazâsına tâbi‘ Başakpınar nâm karye ahâlîsinden olup mahmiye-i İstanbul’da Süleymaniye kurbunda Mehmed Paşa mahallesinde sâkin iken bundan akdem vefât eden Osman b. el-Hâc İbrahim’in verâseti zevce-i metrûkesi Sâliha bt. ( ) nâm hâtun ile sulbiye kebîre kızı Kerime ve li ebeveyn kız karındaşı Ayşe nâm hâtunlara münhasıra ve tashîh-i mes’elesi sekiz sehimden olup sihâm-ı mezbûreden bir sehmi mezbûre Sâliha’ya ve dört sehmi mezbûre Kerime Hâtun’a ve üç sehmi dahi mersûme Ayşe Hâtun’a isâbet ettiği şer‘an mütehakkik oldukdan sonra mezbûre Ayşe’nin oğlu ve tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Satılmış b. Osman ve İsâ b. Ahmed nâm kimesneler şehâdetleriyle şer‘an sâbit olan Mustafa b. Hüseyin nâm kimesne meclis-i şer‘-i enverde müteveffâ-yı mezbûrun terekesine vâzı‘atü’l-yed olan bâ‘isetü hâze’l-vesîka merkūme Kerime Hâtun mahzarında bi’l-vekâle ikrâr ve takrîr-i kelâm edip müteveffâ-yı mezbûrun muhallefâtından mezbûre Kerime Hâtun’un makbûzu olan terekeden ber vech-i muharrer müvekkilem mezbûre Ayşe Hâtun’a isâbet eden bin beş yüz yirmi cedîd râyic fi’l-vakt akçemi vekâletim hasebiyle mezbûre Kerime Hâtun’un makbûzu olan terekeden ber vech-i muharrer müvekkilem mezbûre Ayşe Hâtun’a isâbet eden bin beş yüz yirmi cedîd râyic fi’l-vakt akçeyi vekâletim hasebiyle mezbûre Kerime Hâtun? yedinden tamâmen ahz u kabz eyledim. Min ba‘d müvekkilem mezbûre Ayşe Hâtun’un tereke-i müteveffâ-yı mezbûrdan merkūme Kerime Hâtun yedinde bir akçe ve bir habbe hakkı bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf.


Şuhûdü’l-hâl: Mustafa Beşe b. İbrahim, Ali Efendi b. İlyas, Hasan Beşe b. Mehmed, Abdülvahhab Çelebi b. Mehmed, Satılmış b. Osman, Veli Beşe el-Muhzır ve gayruhüm mine’l-hâzırîn.