|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 180 Hüküm no: 139 Orijinal metin no: [33a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Mehmed Çelebi b. Osman’ın borçlarını ödemeye terekesinin yetmediği ve vârislerinin nafakası için menzilinin Mehmed Ağa’ya satıldığı
Mahmiye-i İstanbul’da Arpa Emîni mahallesi sâkinlerinden iken bundan akdem vefât eden Mehmed Çelebi b. Osman’ın verâseti zevce-i metrûkeleri Emine bt. Mahmud ve Şerife Sâliha bt. es-Seyyid Ali Efendi nâm hâtunlara ve sulbî sagīr oğulları Mehmed ve es-Seyyid Mustafa ve sulbiye sagīre kızı Şerife Fâtıma’ya münhasıra olduğu şer‘an sâbit oldukdan sonra kendi tarafından asîl ve sagīr-i mezbûr Mehmed’in vâlidesi ve kıbel-i şer‘den mansûbe vasîsi olan mezbûre Emine ile kezâlik kendi tarafından asîl ve sagīrân-ı mezbûrân es-Seyyid Mustafa ve Şerife Fâtıma’nın vâlideleri ve kıbel-i şer‘den mansûbe vasîleri olan mezbûre Şerife Sâliha zâtları ma‘rifet-i şer‘iyye ile ârifân olan Mustafa Bey b. Abdülhalil Mehmed Ağa b. Gāzi nâm kimesne mahzarında her biri asâleten ve vesâyeten ikrâr ve takrîr-i kelâm edip müteveffâ-yı mezbûr Mehmed Çelebi’nin düyûn-ı kesîresi olup tereke-i menkūlesi vefâ etmediğinden mâ‘adâ sıgār-ı mezbûrûnun nafakaya ihtiyâcları olmağla müteveffâ-yı mezbûrun terekesinden olup mahalle-i mezbûrede vâki‘ bir tarafdan Emine Hâtun mülkü ve iki tarafdan Gevher Hâtun mülkü olan bahçe ve bir tarafdan tarîk-i âm ile mahdûd bir bâb tahtânî oda ve bir sofa ve bir kenîf ve bahçeyi müştemil menzili dahi bey‘ lâzım olmağın bundan akdem menzil-i mezbûru Sûk-ı sultânî’de kirâr ve mirâr nidâ ve müzâyede ettirip iki yüz seksen guruşa mezbûr Mehmed Ağa üzerinde karâr edip ziyâde ile tâlib-i âhar zuhûr etmeyip, meblağ-ı mezbûr iki yüz seksen guruşa tarafeynden îcâb ve kabûlü hâvî bey‘-i kat‘î ile bey‘ ve teslîm ol dahi iştirâ ve tesellüm ve semen-i mezbûr iki yüz seksen guruşu bize edâ ve teslîm biz dahi yedinden tamâmen ahz u kabz eyledik ba‘de’l-yevm menzil-i mahdûd-ı merkūm mezbûr Mehmed Ağa’nın mülk-i müşterâsıdır. Keyfe mâ yeşâ’ ve yahtâr mutasarrıf olsun dediklerinde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâdî aşer min Saferi’l-hayr li sene seb‘a ve semânîn ve elf.
Şuhûdü’l-hâl: Mustafa Bey b. Abdullah, Hüseyin Halîfe b. Mustafa el-Müezzin, Mustafa b. Musa, İvaz Bey b. (…?) es-Seyyid Ali Efendi el-İmâm, Mehmed Halîfe el-Müezzin, el-Hâc Abdünnebi b. Derviş, Mustafa Bey b. Abdullah, Mustafa Halîfe el-Müezzin, el-Hâc Mehmed Efendi.
|