|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 181 Hüküm no: 140 Orijinal metin no: [33b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Arzuman v. Asvador’un evini Derviş Odabaşı b. Yusuf’a bey‘ bi’l-istiğlâl yoluyla sattığı
Mahmiye-i İstanbul’da Kefeli mahallesinde sâkin Arzuman v. Asvadur nâm zimmî meclis-i şer‘-i şerîfde Derviş Odabaşı b. Yusuf nâm kimesne mahzarında ikrâr ve takrîr-i kelâm edip yedimde mülk hakkım olup mahalle-i mezbûrede vâki‘ bir tarafdan Meryem Hâtun mülkü ve bir tarafdan el-Hâc Mehmed mülkü ve iki tarafdan tarîk-i âm ile mahdûd büyût-ı adîdeyi müştemil menzilimi mezbûr Derviş Odabaşı’ya dört yüz esedî guruşa bi tarîki’l-istiğlâl bey‘ ve teslîm ol dahi ba‘de’l-iştirâ ve kabûl semeni olan meblağ-ı mezbûr dört yüz esedî guruşu mezbûr Odabaşı yedinden tamâmen ahz u kabz eylediğimden sonra merkūm Derviş Odabaşı menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î her otuz günde dörder esedî guruş ücret ile bana îcâr, ben dahi ber vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mezbûr Arzuman’ın dâmâdı Mardiros v. Kirakos nâm zimmî meblağ-ı mezbûr dört yüz guruşa ve menzil-i mezkûrun ücretine emir ve kabûlü hâviye kefâlet-i sahîha-i şer‘iyye ile kefîl olmağın mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene seb‘a ve semânîn ve elf.
Şuhûdü’l-hâl: El-Hâc Hüseyin b. Yahya, Eyyûb Odabaşı b. ( ), Eyyûb b. Hasan, el-Hâc Hüseyin b. Yahya, Receb b. Ali, Ali b. Abdullah, Mehmed Bey b. Hasan, Süleyman Beşe b. ( ), Himmet b. Mehmed ve gayruhüm.
|