.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 181
Hüküm no: 141
Orijinal metin no: [33b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yakub Ağa’nın vakfa ait olup kiraladığı eve el koyan İmam Mahmud Efendi’nin evden çıkması gerektiği

Mahmiye-i İstanbul’da Nahılbend mahallesi sâkinlerinden bâ‘is-i hâze’l-kitâb Yakub Ağa nâm kimesne tarafından husûs-ı âti’l-beyâna vekîl olduğu nehc-i şer‘î ve tarîk-i mer‘î üzre şer‘an sâbit olan Yusuf Çelebi b. Abdullah nâm kimesne meclis-i şer‘-i şerîfde mahmiye-i mezbûrede merhûm Hüseyin Çelebi vakfına hâlâ mütevellî olmağla vakf-ı mezbûrdan olan zikri âtî menzile vâzı‘ü’l-yed olduğu mütehakkik olan İmâm Mahmud Efendi nâm kimesne mahzarında üzerine da‘vâ ve takrîr-i kelâm edip vakf-ı mezbûrdan olup mahalle-i mezbûrede vâki‘ iki tarafdan vakf-ı mezbûrdan olup Hacı Hasan nâm kimesne tasarrufunda olan menzil ve iki tarafdan tarîk-i âm ile mahdûd dâhiliyye ve hâriciyye fevkānî ve tahtânî iki odayı ve tahtapûş ve ahırı müştemil icâre-i mu‘accele ve yevmî üç akçe icâre-i müeccele ile müvekkilim mezbûr Yakub Ağa’nın taht-ı tasarrufunda iken mütevellî-i mezbûr Mahmud Efendi menzil-i mezbûra bi gayr-ı vech vaz‘-ı yed edip müvekkilim merkūm Yakub Ağa’nın tasarrufuna mâni‘ olur, hâlâ mütevellî-i mezbûra suâl olunup menzil-i mezbûrdan kasr-ı yed edip müvekkilim merkūm Yakub Ağa için bana teslîme tenbîh olunmak matlûbumdur dedikde gıbbe’s-suâl merkūm Mahmud Efendi cevâbında müvekkilim merkūm Yakub Ağa’nın ber vech-i muharrer taht-ı tasarrufunda olan menzil-i mezbûru tarafından vekîli olan Süleyman nâm kimesne bedel-i ma‘lûm makbûz mukābelesinde Hasan nâm kimesneye benim iznim ile ferâğ ve tefvîz mezbûr Hasan dahi tefevvüz ve kabûl ettikden sonra bilâ-veled fevt olmağla menzil-i mezbûr intikāl-i âdiyle vakf-ı mezbûra âid olmağla vaz‘-ı yed ederim deyû def‘ ile mukābele edicek gıbbe’l-istintâk ve’l-inkâr mezbûr Ahmed Efendi’den def‘-i mezbûru mübeyyine beyyine taleb olundukda ityân-ı beyyineden izhâr-ı acz ettiğinden mâ‘adâ menzil-i mezbûrun hakk-ı tasarrufu müvekkilim merkūm Yakub Ağa üzerinde olduğu temessükde mastûrü’l-esâmî ve mukayyed bulunmağın menzil-i mezbûrdan kasr-ı yed edip müvekkil-i merkūm Yakub Ağa için müdde‘î-i mezbûra teslîm etmek üzre mütevellî-i mezbûr Mahmud Efendi’ye tenbîh olunmağın mâ vaka‘a bi’t-taleb ketb olundu. Tahrîren fi’l-yevmi’l-hâmis ve’l-ışrîn min Zilhicceti’ş-şerîfe li sene seb‘a ve semânîn ve elf.


Şuhûdü’l-hâl: Pîr Mehmed b. Ali, Mehmed Çelebi b. Şaban, Mustafa Çelebi b. Hasan, İsmail Çelebi b. el-Hâc Murad, Receb Çelebi b. Murad ve gayruhüm.