.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 182
Hüküm no: 142
Orijinal metin no: [33b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Velizâde Ahmed Efendi’nin İbrahim Beşe b. Mustafa’ya olan borcunu mirasçısı kızı Emetullah Hâtun’un ödediği

Mahmiye-i İstanbul’da Pîrinççi Sinan mahallesi sâkinlerinden İbrahim Beşe b. Mustafa nâm kimesne meclis-i şer‘-i şerîfde Kirmasti mahallesinde sâkin iken bundan akdem vefât eden Velizâde Ahmed Efendi’nin sulbiye kebîre kızı ve terekesine vâzı‘atü’l-yed olan fahrü’l-muhadderât Emetullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân olan Süleyman Çelebi b. Osman ve Mehmed Çelebi b. Abdullah nâm kimesneler şehâdetleriyle şer‘an sâbit olan Osman b. Mehmed nâm kimesne mahzarında ikrâr ve takrîr-i kelâm edip müvekkile-i mezbûrenin babası müteveffâ-yı mezbûr Ahmed Efendi’nin hayâtında emri ile ba‘zı levâzımına kendi malımdan sarf eylediğim bin beş yüz parayı ve emrim ile mezbûr Ahmed Efendi ulûfemden yirmi beş guruşu ve bundan akdem vefât eden Rıfâîzâde demekle şehîr Mehmed Efendi zimmetinde hüccet-i deyn-i şer‘îden hakkım olan iki yüz guruşumu ahz [ve] kabz eylediğimden sonra zimmetimde müctemi‘ olan, cem‘an iki yüz altmış iki buçuk guruşumu kable’l-edâ mezbûr Ahmed Efendi vefât etmekle terekesine vâzı‘atü’l-yed olan müvekkile-i mezbûre Emetullah Hâtun’dan bundan akdem taleb [ve] da‘vâ eylediğimde, beynimizde münâza‘ât-ı kesîre vukū‘undan sonra muslihûn tavassut edip beynimizde altmış guru[ş] üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr altmış guruşu yedinden tamâmen ahz u kabz ettiğimden sonra husûs-ı mezkûra müte‘allika da‘vâdan müvekkile-i mezbûre Emetullah Hâtun’un zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Fahrü’l-müderrisîn Atâullâh b. Osman, es-Seyyid Yusuf b. es-Seyyid Mustafa, Ahmed Çelebi b. Ali, Osman b. Ömer, İbrahim Çelebi b. Ahmed, Ahmed Çelebi b. Esad, Mehmed Çelebi b. İlyas ve gayruhüm.