.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 183
Hüküm no: 143
Orijinal metin no: [34a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Kaptanıderya Ali Paşa’nın has gelirini iltizama aldığı Ahmed Ağa’nın peşin verdiği parayı vârislerin ona ödemesi gerektiği

Min hattıhî Kavak Hisarı sâkinlerinden bâ‘is-i hâze’l-kitâb Ahmed Ağa b. Mirşah nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde mahmiye-i İstanbul’da Harâccı Kara Mehmed mahallesi sâkinlerinden olup kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey ve sulbiye kebîr kız[ları] Aliye? Hanım’a ve Hümâ Hanım’a ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun terekesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun etbâ‘ından Abdülbâkī Ağa b. Ahmed ve kethüdâsı Ahmed Ağa b. Ali nâm kimesneler şehâdetleriyle şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûr terekesine vâzı‘ü’l-yed olan mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa hayâtında kapudanlık hâslarından Navla hâssının bin seksen yedi senesinde hâsıla olan olacak mahsûlâtını iki bin esedî guruşa bana der-uhde ben dahi iltizâm ve kabûl ettiğimden sonra meblağ-ı mezbûrun bin guruşunu ber vech-i peşîn müteveffâ-yı mezbûra def‘ ve teslîm ol dahi ahz u kabz edip hattâ ikrâr dahi edip yedime hat ve hatmini hâvî işbu temessük dahi verdiğinden sonra ben zikr olunan hâssı zabt etmezden mukaddem merkūm Ali Paşa vefât edip meblağ-ı mezbûr bin guruş zimmetinde kalmağla merkūmân [Mehmed] Bey ve Ömer Efendi’ye suâl olunup meblağ-ı mezbûru müteveffâ-yı mezbûrun terekesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ile hazînedârı olan diğer Ahmed Ağa b. Abdullah nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında müdde‘î-i mezbûr Ahmed Ağa’ya zikr olunan Navla hâssından sene-i merkūmede hâsıla olan mahsûlâtını iki bin guruşa der-uhde edip ber vech-i peşîn meblağ-ı mezbûrun bin guruşunu müdde‘î-i mezbûr Ahmed Ağa’dan ahz u kabz ettiğini bizim huzûrumuzda ikrâr edip yedine hat ve hatmi hâvî işbu temessükü vermiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr Ahmed Ağa tahlîf-i şer‘î ile tahlîf olundukdan sonra mûcebince meblağ-ı mezbûr bin guruşu müteveffâ-yı mezbûrun terekesinden müdde‘î-i mezbûr Ahmed Ağa’ya edâ ve teslîm[e] merkūmân Ömer Ağa ve Mehmed Bey’e tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Umdetü erbâbü’t-tahrîr ve’l-kalem Hasan Efendi tezkire-i ûlâ, Kıdvetü ashâbü’t-tastîr ve’t-terkīm Yusuf Efendi tezkire-yi sâniye, Mefharü’l-emâsil ve’l-a‘yân hâlâ muhzır Kasım Ağa, Kıdvetü’l-emâsil ve’l-akrân hâlâ çavuşbaşı Murad Ağa, Mefharü’l-ümerâ’i’l-kirâm Ammârzâde Ali Paşa, Fahrü’l-akrân Ahmed Ağa ve gayruhüm mine’l-hâzırîn.