.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 184
Hüküm no: 144
Orijinal metin no: [34a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Kaptanıderya Ali Paşa’nın derya beylerinden Baba Hasan Bey’e olan borcunun terekesinden ödenmesi

Min hattıhî Sâbıkan sâlyâne beylerinden olup hâlâ İnebahtı sancağına mutasarrıf olan mefharü’l-ümerâ’i’l-kirâm bâ‘is-i hâze’l-kitâb Baba Hasan Bey b. Ali dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde mahmiye-i mezbûrede Harâccı Kara Mehmed mahallesi sâkinlerinde olup kapudan iken bundan akdem vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızları Aliye Hanım’a ve Hümâ Hanım’a ve sulbiye sagīre kızı Aliye Hanım’a münhasıra olduğu şer‘an sâbit oldukdan sonra müteveffâ-yı mezbûrun terekesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Aliye Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Ayşe Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun etbâ‘ından Abdülbâkī Ağa b. Ahmed ve kethüdâsı olan Ahmed Ağa b. Ali nâm kimesneler şehâdetleriyle şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun terekesine vâzı‘ü’l-yed olan mûmâ-ileyh Mehmed Bey mahzarında üzerlerine [34b] da‘vâ ve takrîr-i kelâm edip bin seksen dört senesine mahsûb olmak üzre taraf-ı mîrîden bana ta‘yîn ve sâlyâne olunan vazîfemden altı bin beş yüz yirmi bir guruş merhûm-ı mezbûr Ali Paşa hayâtında ahz u kabz ve mesârifine sarf ile istihlâk ettiğinden sonra meblağ-ı mezbûrun bi’d-defe‘ât dört bin dokuz yüz elli beş guruşunu bana def‘ ve teslîm ben dahi ahz u kabz edip bin beş yüz altmış [altı] guruşu bâkī kalıp hattâ merhûm-ı mezbûr Ali Paşa hayâtında ikrâr dahi ettiğinden sonra vefât edip zimmetinde kalmağla merkūmân Mehmed Bey’e ve Ömer Efendi’ye suâl olunup meblağ-ı bâkī-i mezbûru müteveffâ-yı mezbûrun terekesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda merhûm-ı mezbûrun kethüdâsı olan merkūm Ahmed Ağa ile etbâ‘ından olup mahmiye-i mezbûrede Ali Paşa mahallesi sâkinlerinden Yusuf Ağa b. Hasan nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka merhûm-ı mezbûr Ali Paşa hayâtında müdde‘î-i merkūma ta‘yîn ve sâlyâne olunan vazîfesinde altı bin beş yüz yirmi bir guruşu ahz u kabz ve mesârifine sarf ile istihlâk ettiğini bizim huzûrumuzda ikrâr ve bizi işhâd etmiş idi hâlâ müdde‘î-i mezbûr için meblağ-ı merkūmdan kabzını i‘tirâf ettiğinden, bâkī-i meblağ-ı mezbûr bin beş yüz altmış altı guruş müteveffâ-yı mezbûrun terekesinden edâ olunmak lâzım ve vâcib ve lâzib ve müstahakdır biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinden, ba‘de’t-ta‘dîl ve’t-tezkiyye şehâdetleri makbûle olup müdde‘î-i merkūm tahlîf-i şer‘î ile tahlîf olundukdan sonra mûcebince meblağ-ı bâkī-i mezbûr altmış altı esedî guruşu müteveffâ-yı mezbûrun terekesinden müdde‘î-i merkūm Baba Hasan Bey’e edâ ve teslîme merkūmân Mehmed Bey’e ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Umdetü erbâbü’t-tahrîr ve’l-kalem Hasan Efendi tezkire-i ûlâ, kıdvetü ashâbü’t-tastîr ve’r-rakam Yusuf Efendi tezkire-i sânîye, fahrü’l-emâsil ve’l-a‘yân hâlâ Muhzır Kasım Ağa, çavuşbaşı Murad Ağa, fahrü’l-ümerâ’i’l-kirâm Ammârzâde Ali Paşa, Fahrü’l-akrân selam Çavuşu Ahmed Ağa ve gayruhüm mine’l-hâzırîn.