.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 186
Hüküm no: 145
Orijinal metin no: [34b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Derya beylerinden Ammârzâde Ali Paşa’nın vefat eden Kaptanıderya Ali Paşa’da olan alacağının terekesinden tahsili

Deryâ beylerinden olup Ammâ[r]zâde demekle şehîr mefharü’l-ümerâ’i’l-kirâm bâ‘is-i hâze’l-kitâb Ali Paşa dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-Merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye sagīre kızı Aliye Hanım’a [ve Hümâ Hanım’a] ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmân Aliye Hanım ve Hümâ Hanım tarafından husûs-ı âti’l-beyâna vekîlleri olduğu zâtları ma‘rifet-i şer‘iyye ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesneler şehâdetleriyle şer‘an sâbit olan Ömer Efendi b. Hüseyin nâm kimesne ile mûmâ-ileyh Mehmed Bey mahzarında üzerlerine da‘vâ ve takrîr-i kelâm edip müteveffâ-yı mezbûr Ali Paşa’ya hayâtında bin seksen beş senesinde altı bin dört yüz esedî guruşumu ikrâz ve teslîm ol dahi iktirâz ve kabz edip hattâ şuhûd mahzarında ikrâr dahi edip yedime hat ve hatmini hâvî işbu temessükü verdiğinden sonra meblağ-ı mezbûrun bi’d-defe‘ât iki bin beş yüz guruşunu bana edâ ve teslîm ben dahi ahz u kabz edip hattâ şuhûd mahzarında ikrâr dahi edip yedime hat ve hatmi hâvî işbu temessükü verdiğinden sonra meblağ-ı mezbûrun bi’d-defe‘ât iki bin beş yüz guruşunu bana edâ ve teslîm ben dahi ahz u kabz edip üç bin dokuz yüz guruşu bâkī kalıp kable’l-edâ merkūm Ali Paşa vefât edip zimmetinde kalmağla hâlâ merkūmân [35a] Mehmed Bey ve Ömer Efendi’ye suâl olunup meblağ-ı bâkī-i mezbûr üç bin dokuz yüz guruşu müteveffâ-yı mezbûrun terekesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun Dîvân efendisi Sâlih Efendi b. Süleyman ve kethüdâsı olan merkūm Ahmed Ağa li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında müdde‘î-i mûmâ-ileyh Ali Paşa yedinden altı bin dört yüz esedî guruş iktirâz ve kabz ettiğini bizim huzûrumuzda ikrâr ve bizi işhâd ettiğinden sonra hat ve hatmini hâvî işbu temessükü vermiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr Ali Paşa tahlîf-i şer‘î ile tahlîf olundukdan sonra mûcebince meblağ-ı bâkī-i merkūm üç bin dokuz yüz esedî guruşu müteveffâ-yı mezbûrun tereke-i vâfiyesinden müdde‘î-i mûmâ-ileyh Ali Paşa’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.


Şuhûdü’l-hâl: Umdetü erbâbü’t-tahrîr ve’l-kalem Hasan Efendi tezkire-i ûlâ hâlâ, mefharü’l-eşbâh ve’l-ekfâ çavuşbaşı Murad Ağa, umdetü’l-emâsil ve’l-e‘âlî muhzır Kasım Ağa hâlâ, fahrü’l-akrân el-Hâc Kemal Kethüdâ-yı Hazret-i Efendi, muhzırbaşı Mehmed Ağa.