.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 187
Hüküm no: 146
Orijinal metin no: [35a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Beşiktaş’tan Mehmed Ağa b. Veli’nin vefat eden Kaptanıderya Ali Paşa’da olan alacağının terekesinden tahsili

Mahrûse-i Galata müzâfâtından kasaba-i Beşiktaş sâkinlerinden bâ‘is-i hâze’l-kitâb Mehmed Ağa b. Veli nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızı Aliye Hanım ve Hümâ Hanım ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olup zâtlarını ma‘rifet-i şer‘iyye ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesneler şehâdetleriyle şer‘an sâbit olan Ömer Efendi b. Hüseyin nâm kimesne ile kezâlik tereke-i müteveffâ-yı mezbûra vâzı‘ü’l-yed olan mûmâ-ileyh Mehmed Bey mahzarında üzerlerine da‘vâ ve takrîr-i kelâm edip müteveffâ-yı mezbûr Ali Paşa hayâtında kapudanlık hâslarından Liyanve ve Gilindire hâslarının bin seksen altı senesinde hâsıla olacak mahsûllerini yüz elli bin akçeye bana der-uhde ben dahi ber vech-i tahrîr iltizâm ve kabûl ettiğimden sonra meblağ-ı mezbûrun yetmiş beş bin akçesini ber vech-i peşîn merkūm Ali Paşa’ya def‘ ve teslîm ol dahi ahz u kabz edip hattâ şuhûd mahzarında ikrâr dahi ettiğinden sonra yedimde hat ve hatmi hâvî işbu temessükü dahi verdiğinden sonra ben zikr olunan hâsları zabt etmezden mukaddem merkūm Ali Paşa vefât edip meblağ-ı mezbûr zimmetimde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı mezbûr yetmiş beş bin akçeyi müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ile hazînedârı olan diğer Ahmed Ağa b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında zikr olunan Liyanve [35b] ve Gilindire hâslarının bin seksen altı senesinde hâsıla olacak mahsûllerini müdde‘î-i mezbûr Mehmed Ağa’ya yüz elli bin akçeye der-uhde ve yetmiş beş bin akçesini mezbûr Mehmed Ağa yedinden ber vech-i peşîn ahz u kabz ettiğini bizim huzûrumuzda ikrâr ve bizi işhâd edip hat ve hatmi hâvî işbu temessükü vermiş idi biz [bu] husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr Mehmed Ağa tahlîf-i şer‘î ile tahlîf olundukdan sonra mûcebince meblağ-ı mezbûr yetmiş beş bin akçeyi müteveffâ-yı mezbûrun tereke-i vâfiyesinden müdde‘î-i mezbûr Mehmed Ağa’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf.


Şuhûdü’l-hâl: Hasan Efendi tezkire-i ûlâ hâlâ, çavuşbaşı Murad Ağa, muhzır Kasım Ağa hâlâ, Kemaleddin Kethüdâ-yı Hazret-i Efendi, muhzırbaşı Mehmed Ağa hâlâ.