.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 188
Hüküm no: 147
Orijinal metin no: [35b-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yasef v. Mayer isimli yahudinin Kaptanıderya Ali Paşa’daki alacağının terekesinden tahsili

Mahmiye-i İstanbul’da Balat hâricinde Karabaş mahallesi sâkinlerinden bâ‘is-i hâze’r-rakīm Yasef v. Mayer nâm yahudi dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey sulbî sagīr oğlu Ebûbekir Bey’e? ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesinde vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân mezbûrun etbâ‘ından Abdülbâkī Ağa b. Ahmed ve kethüdâ Ahmed Ağa b. Ali nâm kimesneler şehâdetleriyle şer‘an sâbit olan, Ömer Efendi b. Hüseyin nâm kimesne ile kezâlik müteveffâ-yı mezbûrun terekesine vâzı‘ü’l-yed olan mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa zimmetinde hayâtında bin seksen altı senesi îd-i şerîfi peşkeşi için yedimden iştirâ ve kabz eylediği beynimizde ma‘lûm emti‘a-i mütenevvi‘a bahâlarından bâkī sekiz bin dört yüz doksan dokuz buçuk guruş dibâ bahâsından yüz on altı buçuk guruş, min haysi’l-mecmû‘ sekiz bin altı yüz on altı guruş hakkım olup hattâ şuhûd mahzarında ikrâr dahi edip yedime hat ve hatmi hâvî temessük verdiğinden sonra meblağ-ı mezbûru kable’l-edâ vefât edip zimmetinde kalmağla hâlâ merkūmân Mehmed Bey ve Ömer Efendi’ye suâl olunup meblağ-ı merkūm sekiz bin altı yüz on altı guruşu müteveffâ-yı mezbûrun tereke-i vâfiyesinden bana edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun Dîvân efendisi olan Sâlih Efendi ve Hazînedârı olan Ahmed Ağa b. Abdullah ve kethüdâsı olan merkūm Ahmed Ağa li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Ali Paşa hayâtında müdde‘î-i mezbûr yedinden iştirâ ve kabz ettiği beynlerinde ma‘lûme emti‘a-i mütenevvi‘a bahâlarından sekiz bin altı yüz on altı guruş vâcibü’l-edâ ve lâzımü’l-kazâ deyni olduğunu bizim huzûrumuzda ikrâr ve bizi işhâd etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr Yasef tahlîf olundukdan sonra mûcebince meblağ-ı mezbûr sekiz bin altı yüz on altı guruşu müteveffâ-yı mezbûrun [36a] tereke-i vâfiyesinden müdde‘î-i mezbûr Yasef’e edâ ve teslîme mezbûrân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min Saferi’l-hayr li sene seb‘a ve semânîn ve elf.


Şuhûdü’l-hâl: ( ).