|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 189 Hüküm no: 148 Orijinal metin no: [36a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaptanıderya Ali Paşa’nın kethüdâsının Mehmed Ağa b. Hüseyin’e Ali Paşa adına aldığı eşyanın kalan borcunu ödemesi gerektiği
Mahmiye-i İstanbul’da Beyceğiz mahallesi sâkinlerinden râfi‘-i hâze’l-kitâb Mehmed Ağa b. Hüseyin nâm kimesne dîvân-ı kāimmakām-ı hazret-i sadr-ı a‘zamîde merhûm Kapudan Ali Paşa’nın kethüdâsı olan fahrü’l-akrân Ahmed Ağa b. el-merhûm Ali Ağa nâm kimesne mahzarında üzerine da‘vâ ve takrîr-i kelâm edip merkūm Ahmed Ağa merhûm-ı mezbûrun kerîmelerine cihâz için yedimden iştirâ ve kabz eylediği evânî-i nühâsiyye semenlerinden zimmetinde hakkım olan dört yüz yirmi altı guruşun yüz yirmi yedi buçuk guruşunu bana edâ ve teslîm ben dahi ahz u kabz edip iki yüz doksan sekiz buçuk guruşu bâkī kalmağla hâlâ merkūm Ahmed Ağa’ya suâl olunup meblağ-ı bâkī-i mezbûr iki yüz doksan sekiz buçuk guruşun alıverilmesi matlûbumdur dedikde gıbbe’s-suâl merkūm Ahmed Ağa cevâbında kaziyye minvâl-i muharrer üzre olup zikr olunan evânî-i nühâsiyye semenlerinde meblağ-ı bâkī-i mezbûr iki yüz doksan sekiz buçuk guruş zimmetinde müdde‘î-i mezbûra vâcibü’l-edâ ve lâzımü’l-kazâ deyni olduğunu ikrâr ve i‘tirâf etmeğin mûcebince meblağ-ı bâkī-i mezbûr iki yüz doksan sekiz buçuk guruşu müdde‘î-i mezbûra edâ ve teslîme merkūm Ahmed Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.
Şuhûdü’l-hâl: Hasan Efendi tezkire-yi ûlâ, Yusuf Efendi tezkire-yi sâniye, Murad Ağa, Muhzır Kasım Ağa, Ali Efendi.
|