.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 190
Hüküm no: 149
Orijinal metin no: [36a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed Ağa b. Ömer’in Kaptanıderya Ali Paşa’dan alacağının terekesinden ödenmesi

Mahmiye-i İstanbul’da Hobyar mahallesi sâkinlerinden bâ‘is-i hâze’l-kitâb Ahmed Ağa b. Ömer nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde mahmiye-i İstanbul’da Harâccı Kara Mehmed mahallesi sâkinlerinden olup kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızları Aliye ve Hümâ Hanım’a ve sulbiye sagīre kızı Ayşe Hanım’a münhasıra olduğu şer‘an sâbit oldukdan sonra müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrân Ebûbekir Bey ve Ayşe Hanım’ın vasiyy-i muhtârları olan mûmâ-ileyhâ Rukiye Hanım ve merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun etbâ‘ından Abdülbâkī Ağa b. Ahmed ve kethüdâsı Ahmed Ağa b. Ali nâm kimesneler şehâdetleriyle şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun tereke-i vâfiyesine vâzı‘ü’l-yed olan mûmâ-ileyh Mehmed Efendi mahzarında üzerlerine da‘vâ ve takrîr-i kelâm edip müteveffâ-yı mezbûr Ali Paşa hayâtında kapudanlık hâslarından doğan yuvası hâssının bin seksen dört senesinde hâsıla olacak mahsûlâtını yüz bin akçeye bana der-uhde ben dahi iltizâm ve kabûl eylediğimden sonra meblağ-ı mezbûr elli bin akçesi ber vech-i peşîn müteveffâ-yı mezbûra def‘ ve teslîm ol dahi ahz u kabz edip hattâ ikrâr dahi edip yedime hat ve hatmini hâvî işbu temessükü dahi verdiğinden sonra ben zikr olunan hâssı zabt etmezden mukaddem merkūm Ali Paşa vefât etmekle hâlâ mezbûrân Mehmed Bey ve Ömer Efendi’ye suâl olunup meblağ-ı mezbûru müteveffâ-yı mezbûr tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa ile hazînedârı olan diğer Ahmed Ağa b. Abdullah nâm [36b] kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Ali Paşa hayâtında müdde‘î-i mezbûr Ahmed Ağa’ya zikr olunan doğan yuvası hâssının sene-i merkūmede hâsıla olacak mahsûlâtını yüz bin akçeye der-uhde edip ber vech-i peşîn meblağ-ı mezbûrun elli bin akçesini müdde‘î-i mezbûr Ahmed Ağa’dan ahz u kabz ettiğini bizim huzûrumuzda ikrâr ve bizi işhâd edip yedimize emri ile hat ve hatmi hâvî işbu temessükü vermiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr Ahmed Ağa tahlîf-i şer‘î ile tahlîf olundukdan sonra mûcebince meblağ-ı mezbûr elli bin akçeyi müteveffâ-yı mezbûrun tereke-i vâfiyesinden müdde‘î-i mezbûr Ahmed Ağa’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf. Şuhûdü hâzihi’l-hücceti aynı şuhûdi hüccetin kubeyle hâzihî.