|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 191 Hüküm no: 150 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Ağa b. Abdurrahman’ın Kaptanıderya Ali Paşa’dan alacağının terekesinden ödenmesi
Mahmiye-i İstanbul’da Kırkçeşme kurbunda Yakub Ağa mahallesi sâkinlerinden fahrü’l-akrân bâ‘is-i hâze’l-kitâb Ali Ağa b. Abdurrahman nâm kimesne dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde bundan akdem kapudan iken vefât eden merhûm Ali Paşa b. el-merhûm Mustafa Paşa’nın verâseti zevce-i metrûkesi fahrü’l-muhadderât Rukiye Hanım bt. el-merhûm Mehmed Paşa ve sulbî kebîr oğlu Mehmed Bey ve sulbî sagīr oğlu Ebûbekir Bey’e ve sulbiye kebîre kızları Aliye Hanım ve Hümâ Hanım ve sulbiye sagīre kızı Ayşe Hanım’a münhasıra olduğu şer‘an sâbit oldukdan [sonra] müteveffâ-yı mezbûrun tereke-i vâfiyesine vâzı‘atü’l-yed olup kendi tarafından asîl ve sagīrân-ı mezbûrânın vasiyy-i muhtârları olan mûmâ-ileyhâ Rukiye Hanım ile merkūmetân Aliye Hanım ve Hümâ Hanım taraflarından husûs-ı âti’l-beyâna vekîlleri olduğu zâtlarını ma‘rifet-i şer‘iyye ile ârifân müteveffâ-yı mezbûrun kethüdâsı Ahmed Ağa b. Ali ve etbâ‘ından Abdülbâkī Ağa b. Ahmed nâm kimesneler şehâdetleri şer‘an sâbit olan Ömer Efendi b. Hüseyin nâm kimesne ile kezâlik müteveffâ-yı mezbûrun tereke-i vâfiyesine vâzı‘ü’l-yed olan mûmâ-ileyh Mehmed Bey mahzarlarında üzerlerine da‘vâ ve takrîr-i kelâm edip müteveffâ-yı mezbûr Ali Paşa’ya hayâtında bir def‘a altı bin iki yüz esedî guruşumu ve bir def‘a dahi dokuz bin yedi yüz esedî guruşumu ikrâz ve teslîm merkūm Ali Paşa dahi iktirâz ve tesellüm edip hattâ şuhûd mahzarında ikrâr dahi edip yedime hat ve hatmini hâvî işbu iki kıt‘a temessükü dahi verdiğinden sonra meblağayn-i mezbûreyn cem‘an on beş bin dokuz yüz guruşun dört bin yüz seksen üç guruşunu bana edâ ve teslîm ben dahi ahz u kabz edip on bir bin yedi yüz on yedi guruşu bâkī kalıp kable’l-edâ merkūm Ali Paşa vefât edip zimmetinde kalmağla hâlâ merkūmân Mehmed Bey ve Ali Efendi’ye suâl olunup meblağ-ı bâkī-i mezbûr on bir bin yedi yüz on yedi guruşu müteveffâ-yı mezbûrun tereke-i vâfiyesinden bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i merkūmdan müdde‘âsını mübeyyine beyyine taleb olundukda müteveffâ-yı mezbûrun kethüdâsı olan merkūm Ahmed Ağa [ve] Dîvân efendisi olan Sâlih Efendi b. Süleyman ve hazînedârı olan diğer Ahmed Ağa b. Abdullah nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Ali Paşa hayâtında müdde‘î-i merkūm Ali Ağa’dan bir def‘a altı bin iki yüz guruş ve bir def‘a dahi dokuz bin yedi yüz [37a] guruş iktirâz ve kabz ettiğini bizim huzûrumuzda ikrâr ve bizi işhâd ettiğinden sonra hat ve hatmi hâvî işbu iki kıt‘a temessükü vermiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i merkūm Ali Ağa tahlîf-i şer‘î ile tahlîf olundukdan sonra mûcebince meblağ-ı bâkī-i mezbûr on bir bin yedi yüz on yedi guruşu müteveffâ-yı mezbûr Ali Paşa’nın tereke-i vâfiyesinden müdde‘î-i merkūm Ali Ağa’ya edâ ve teslîme merkūmân Mehmed Bey ve Ömer Efendi’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min Saferi’l-hayr li sene seb‘a ve semânîn ve elf. Şuhûdü hâzihi’l-hücceti aynı şuhûdi hücceti kabîli hâzihî.
|