|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 192 Hüküm no: 151 Orijinal metin no: [37a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Vefat eden Kadı Abdülfettâh’ın Arab Mehmed mahallesinde ev ve bahçesinin vârislerince es-Seyyid Hüseyin Çelebi b. el-Hâc Hüdâverdi’ye satıldığı
Mahmiye-i İstanbul’da Arab Mehmed mahallesi sâkinlerinden olup Maraş kadısı oldukdan sonra vefât eden Altıparmak merhûm Abdülfettâh[’ın] verâseti sulbî kebîr oğulları fahrü’l-müderrisînü’l-kirâm Abdülbâkī Efendi ve Abdülaziz Efendi’ye ve sulbiye kebîre kızı fahrü’l-muhadderât Ayşe Hâtun mahzarında olduğu şer‘an sâbit oldukdan sonra mûmâ-ileyhimâ Abdülaziz Efendi ve Abdülbâkī Efendi kendi taraflarından asâleten ve merkūme Ayşe Hâtun tarafından husûs-ı âti’l-beyâna vekîl oldukla[rı] zâtını ma‘rifet-i şer‘iyye ile ârifân mahmiye-i İstanbul’da Acem mahallesi sâkinlerinden Hasan Efendi b. Ömer ve Ahmed Çelebi b. Süleyman nâm kimesneler şehâdetleriyle şer‘an sâbit olmağla vekâleten meclis-i şer‘-i şerîfde mahrûse-i mezbûre ahâlîsinden sâhib-i hâze’l-kitâb es-Seyyid Hüseyin Çelebi b. el-Hâc Hüdâverdi nâm kimesne mahzarında ikrâr ve takrîr-i kelâm edip merhûm-ı mezbûrun terekesinden olup mahrûse-i mezbûrede mârrü’z-zikr Arab Mehmed mahallesinde vâki‘ bir tarafdan fahrü’l-kuzât Mehmed Efendi mülkü ve bir tarafdan Ahî Mahmud vakfı olan bahçe ve bir tarafdan ba‘zan Hazret-i Emir vakfı olan menzil ve ba‘zan nişâncı Hüseyin mülkü ve ba‘zan es-Seyyid Mehmed Çelebi b. el-Hâc Mustafa menzili ve bir tarafdan tarîk-i âm ile mahdûd hâriciyye ve dâhiliyyeyi muhtevî hâriciyyesinde fevkānî bir bâb oda ve tahtânî iki harâb oda ve dâhiliyyesinde fevkānî iki bâb oda ve tahtında bir ahır ve bir fırın ve bir kiler ve zât-ı eşcâr bahçe ve iki bi’r-i mâ su cârî olup dört çeşmeyi müştemil menzili, bi cümleti’t-tevâbi‘ ve’l-levâhık mukaddemâ merkūm es-Seyyid Hüseyin Çelebi’ye tarafından îcâb ve kabûlü hâvî şurût-ı müfsideden ârî bey‘-i kat‘î ile dört yüz yirmi guruşa bey‘ ve teslîm ve merhûm-ı mezbûr Ahî Mahmud vakfından icâreteyn-i ma‘lûmeteyn ile babamız merhûm-ı merkūmun ile’l-vefât taht-ı tasarrufunda olup ba‘de vefâtihî intikāli âdî ile bize ve müvekkile-i merkūme Ayşe Hâtun’a intikāl edip bir tarafdan menzil-i mezbûr ve bir tarafdan merhûm İshak Efendi veresesi mülkleri ve bir tarafdan Raziye? Hâtun menzili ve bir tarafdan el-Hâc Ahmed menzili ile mahdûd mârrü’z-zikr zât-ı eşcâr-ı müsmire ve gayr-ı müsmire ve bahçeyi yüz esedî guruşa bedeli mukābelesinde izn-i mütevellî ile ferâğ ve tefvîz merkūm es-Seyyid Hüseyin Çelebi dahi menzil-i mezbûru ber vech-i muharrer iştirâ ve tesellüm ve bahçe-i mezbûru tefvîz ve kabûl ettiğinden sonra semen-i mezbûr dört yüz yirmi guruşu ve bedel-i merkūm yüz guruşu, cem‘an beş yüz yirmi guruşu bize tamâmen edâ ve teslîm biz dahi asâleten ve vekâleten yedinden ahz u kabz etmiş idik. Min ba‘d menzil-i mezbûr merkūm es-Seyyid Hüseyin Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun ve bahçe-yi mezkûre hakk-ı müfevvezidir emsâli gibi tasarruf eylesin dediklerinde merkūm es-Seyyid Ahmed Çelebi mûmâ-ileyhimâ Abdülaziz Efendi ve Abdülbâkī Efendi’nin kelimât-ı meşrûhalarını tasdîk ve tahkīk etmeğin mâ vaka‘a bi’t-taleb ketb olundu. Fi’s-sâlis aşer min Saferi’l-muzaffer li sene seb‘a ve semânîn ve elf.
Şuhûdü’l-hâl: Fahrü’l-kuzât-ı müteşerri‘în Receb Efendi b. Abdülkādir, es-Seyyid Ali Efendi b. Abdülkādir, es-Seyyid Said Mehmed Çelebi b. es-Seyyid Mehmed, es-Seyyid Mustafa Çelebi b. es-Seyyid Mehmed, es-Seyyid Receb b. es-Seyyid Mehmed, es-Seyyid Mustafa Çelebi b. es-Seyyid Mehmed, es-Seyyid Mehmed Çelebi b. Hüdâverdi, Habib Efendi b. Veli, Ahmed Çelebi b. Veli, İbrahim Çelebi b. Emir, Abdurrahman Çelebi b. Ebûbekir ve gayruhüm mine’l-hâzırîn.
|