|
İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 194 Hüküm no: 152 Orijinal metin no: [37a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Ağa b. Kanber’in Fâtıma bt. Mustafa’daki alacağının tahsil edildiği
Mahrûse-i Bursa’da Alaca Mescid mahallesinde sâkin Mehmed Ağa b. Kanber nâm kimesne tarafından husûs-ı âti’l-beyâna vekîl olup vekâleti mahrûse-i mezbûrede Abdal Mehmed mahallesinde sâkin Mehmed b. Ahmed ve Yeşil İmâret mahallesinden İsmail Çelebi b. Abdullah nâm kimesneler şehâdetleriyle şer‘an sâbite olan İsmail Efendi b. Mahmud nâm kimesne meclis-i şer‘-i şerîf-i enver ve mahfil-i [37b] dîn-i münîf-i ezherde, sâbıkan mahrûse-i mezbûrede mesned-ârâ-yı şerî‘at-ı garrâ olan a‘lemü’l-ulemâ’i’l-mütebahhirîn efdalü’l-fuzalâ’i’l-müteverri‘în Kevâkib[î]zâde Şeyh Mehmed Efendi’nin kethüdâları olup mahmiye-i İstanbul hısnı ebvâbından Balatkapısı dâhilinde el-Hâc İsâ mahallesinde sâkin bâ‘is-i hâze’l-kitâb fahrü’l-akrân İbrahim Ağa b. Muzaffer nâm kimesnenin zevcesi ve tarafından husûs-ı câ’i’z-zikre sâbitü’l-vekâle vekîli olan Fâtıma bt. Mustafa nâm hâtun mahzarında bi’l-vekâle ikrâr-ı tâm ve takrîr-i kelâm edip mahrûse-i merkūme esvâkından Uzunçarşı demekle ma‘rûf sûkda vâki‘ bir tarafdan müvekkil-i mezbûr Mehmed Ağa mülkü ve bir tarafdan Ali b. Nurullah mülkü ve bir tarafdan Çukur Kahve demekle ma‘rûf dükkân ve bir tarafdan tarîk-i âm ile mahdûd arsanın senede merhûm Gāzi Timurtaş vakfına üç yüz seksen dört akçe mukāta‘ası olan iki kepenk bezzâz dükkânını mukaddemâ muhterik olmağla mahrûse-i mezbûrede Câmi-i kebîr mahallesinde sâkin iken bundan akdem vefât eden el-Hâc Osman b. Abdullah nâm kimesne hayâtında malı ile mülkü olmak üzre nefsi için binâ ve mülkiyyet üzr[e] nice eyyâm mutasarrıf olduğundan sonra vefât ettikde, dükkân-ı mezkûr zevce-i metrûkesi Ayşe bt. Ali nâm hâtun ile sulbiye sagīre kızı Fâtıma’ya intikāl edip ba‘dehu mezbûre Fâtıma dahi vefât edip hissesi vâlidesi mezbûra Ayşe’ye intikāl etmiş iken müteveffâ-yı mezbûra Fâtıma’nın hîn-i vefâtında merkūm İbrahim Ağa vakf-ı mezbûra kāimmakām-ı mütevellî bulunmağla, mârrü’z-zikr dükkânın binâsını müteveffâ-yı mezbûr el-Hâc Osman, mütevellî izinsiz binâ etmekle vakfın olur deyû fuzûlen alıp bi’t-tevliyye müvekkilim mezbûr Mehmed Ağa’ya üç yüz on beş esedî guruş ücret-i mu‘accele ile îcâr ve meblağ-ı mezbûr üç yüz on beş esedî guruşu yedinden tamâmen ahz u kabz edip yedine hat ve hatmi hâvî temessük dahi verdiğinden sonra mezbûr Ayşe’nin vekîli Ahmed Efendi b. Mehmed nâm kimesne dükkân-ı mezkûru müteveffâ-yı mezbûr el-Hâc Osman ber vech-i muharrer mülkü olup ba‘de vefâtihî mezbûr Ayşe ile müteveffât-ı mezbûre Fâtıma’ya ba‘de vefâtihâ merkūme Ayşe’ye intikāl eylediğini müvekkil-i mezbûr Mehmed Ağa muvâcehesinde bundan akdem mahrûse-i mezkûrede hâkimü’ş-şer‘ olan umdetü’l-mevâli’l-izâm ve’l-e‘âli’l-kirâm Mehmed Efendi b. Hüseyin huzûrunda vech-i şer‘î üzre isbât ve ba‘de’l-hükm dükkân-ı mezkûru müvekkil-i mezbûr Mehmed Ağa yedinden alıp kabz ve zabt etmekle ben dahi mezbûr İbrahim Ağa’nın müvekkilim mezbûr Mehmed Ağa’dan ber vech-i muharrer makbûzu olan meblağ-ı mezbûr üç yüz on beş esedî guruşu vekâlet-i mahkiyem hasebiyle merkūm İbrahim Ağa’nın zevcesi vekîli olan mezbûre Fâtıma Hâtun’dan bi’l-vekâle da‘vâ ve taleb eylediğimde, ol dahi edâdan imtinâ‘ etmeğin beynimizde münâza‘ât-ı şedîde ve muhâsamât-ı ekîde vukū‘undan sonra muslihûn tavassut edip yetmiş kıt‘a esedî guruşu ile işbu orta boylu, açık kaşlı, sarı ala gözlü Rûsiyyetü’l-asl tahmînen on iki yaşında Latife nâm bikr câriye üzerine vekîl-i mezbûre Fâtıma Hâtun ile beynimizde inşâ-i akd-i sulh eylediklerinde ben dahi bi’l-vekâle sulh-i mezbûru kabûl ve bedel-i sulh olan meblağ-ı mezbûre yetmiş esedî guruş ile câriye-i mezkûreyi merkūme Fâtıma Hâtun yedinden bi’l-vekâle ahz u kabz ettiğimden sonra husûs-ı mezkûra müte‘allika âmme-i de‘âvî ve mütâlebâtdan ben bi’l-vekâle mezbûr İbrahim Ağa’nın zimmetini ibrâ-i âmm-ı kātı‘ü’n-nizâ‘la ibrâ ve iskāt edip ve mezbûre Fâtıma Hâtun dahi bedel-i sulh olan meblağ-ı mezbûr ile câriye-i mezkûreye müte‘allika da‘vâdan benim ve müvekkil-i mezbûr Mehmed Ağa’nın zimmetini ibrâ ve iskāt eyledi dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Saferi’l-hayr li sene seb‘a ve semânîn ve elf.
Şuhûdü’l-hâl: Mehmed b. Mustafa, Süleyman b. Mehmed, Seyyid Mehmed b. Mustafa, Habib Beşe b. Osman, Hasan Efendi el-İmâm, Ali Dede b. ( ) el-Müezzin, el-Hâc Yusuf b. Himmet, Şâhin b. Abdullah, el-Hâc Mustafa b. Tevekkül, İbrahim b. Ahmed, Durmuş b. Abdullah ve gayruhüm.
|