.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 195
Hüküm no: 153
Orijinal metin no: [38a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ayşe bt. Mehmed’in İstanbul’da vakfa ait evini kocası İsmail Bey b. İbrahim’e hibe ettiği

Mahmiye-i Edirne’de Sitti Hâtun mahallesinde Ayşe b. Mehmed nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Hüseyin Bey b. Hasan ve Hasan Bey b. Mehmed nâm kimesneler şehâdetleriyle şer‘an sâbit olan Mehmed Bey b. Mahmud nâm kimesne meclis-i şer‘-i şerîfde mezbûre Ayşe’nin zevci olan bâ‘is-i hâze’l-kitâb fahrü’l-akrân İsmail Bey b. İbrahim mahzarında bi’l-vekâle ikrâr ve takrîr-i kelâm edip müvekkilem mezbûre Ayşe’nin mahmiye-i İstanbul’da Peykhâne kurbunda merhûm Dizdârzâde Mehmed Efendi evkāfından olup yine merhûm-ı mezbûrun mescid-i şerîfine muttasıl olup icâre-i mu‘accele ve müeccele ile taht-ı tasarrufunda olan menzilini izn-i mütevellî ile meccânen zevci mezbûr İsmail Bey’e ferâğ ve tefvîz edip ol dahi tefevvüz ve kabûl eyledi ba‘de’l-yevm mârrü’z-zikr olan menzil-i mezbûr İsmail Bey’in mülk-i müfevvezidir, emsâli tasarrufu gibi tasarruf eylesin dedikde gıbbe’t-tasdîki’ş-şer‘î ve’t-tahkīki’l-mer‘î mâ vaka‘a bi’t-taleb ketb olundu. Fi’l-yevmi’t-tâsi‘ aşer min Saferi’l-hayr li sene seb‘a ve semânîn ve elf.


Şuhûdü’l-hâl: Mehmed b. Ahmed, Mehmed b. Mehmed, Ali Çelebi b. Yusuf, İbrahim Çelebi b. İsmail ve gayruhüm.