.:: İstanbul Kadı Sicilleri ::. 

İstanbul Mahkemesi 18 Numaralı Sicil (H. 1086-1087/M. 1675-1676)
cilt: 18, sayfa: 196
Hüküm no: 154
Orijinal metin no: [38a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Abdülkadir Efendi b. Yusuf’un Avanos v. Aziz zimmetindeki alacağını kefili Ayder v. Baragat’tan tahsil ettiği

Husûs-ı âti’l-beyânın mahallinde tahrîri iltimâs olunmağın savb-ı şer‘-i enverden Mevlânâ Hüseyin Efendi b. Himmet irsâl olunup ol dahi Hezarfen Hüseyin Efendi’nin mahmiye-i İstanbul’da Fethiye câmi‘-i şerîfi kurbunda vâki‘ sâkin oldukları menzile varıp zeyl-i kitâbda muharrerü’l-esâmî olan müslimîn huzûrunda akd-i meclis-i şer‘-i mübîn eyledikde meclis-i ma‘kūd-ı mezbûrda mahmiye-i merkūmede Tahtaminâre mahallesinde sâkin Abdülkādir Efendi b. Yusuf nâm kimesne Koyrova? cemâ‘atinden Ayder v. Baragat nâm yahudi mahzarında ikrâr-ı tâm ve takrîr-i kelâm edip mezbûr Ayder gāib ani’l-meclis Avanos v. Gazar nâm zimmî zimmetinde cihet-i karzdan yüz kırk iki buçuk guruş hakkım olmağla meblağ-ı mezbûr yüz kırk iki buçuk guruşumu mezbûr Ayder kefîl bi’l-mâl olmağın meblağ-ı mezbûru bundan akdem mezbûr Ayder’den kefâletine binâen da‘vâ ve taleb eylediğimde, mezbûr Ayder meblağ-ı mezbûra kefîl olduğunu bi’l-külliye inkâr edip ben dahi müdde‘âmı vech-i şer‘î ve tarîk-i mer‘î üzre isbât sadedinde iken beynimizde münâza‘ât-ı kesîre ve muhâsamât-ı şedîde vâki‘ olmuş idi el-hâletü hâzihî beynimize muslihûn tavassut edip mezbûr Ayder ile beynimizde elli kıt‘a esedî guruş ile levni beynimizde ma‘lûm yirmi beş aded Tokat bezi çintiyân üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr elli guruş ile sâlifü’z-zikr yirmi beş aded çintiyân mezbûr Ayder yedinden bi’t-tamâm ve’l-kemâl ahz u kabz edip ba‘de’l-yevm meblağ-ı mezbûr yüz kırk iki buçuk guruşa ve sâir ahz [u] i‘tâya ve bi’l-cümle hukūk-ı ma‘lûme ve mechûle da‘vâsından kefîl-i mezbûr Ayder ile gāib-i mezbûr Avanos’un zimmetlerini ibrâ-i âmm-ı kātı‘ü’l-hısâm ile ibrâ ve iskāt eyledim dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr ve ma‘an irsâl olunan Durmuş Beşe b. Veli ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min Saferi’l-muzaffer li sene seb‘a ve semânîn ve elf.


Şuhûdü’l-hâl: Abdülbâkī Çelebi b. Hasan el-Müezzin, Abdullah Efendi b. Rıdvan, Molla Süleyman b. Mustafa, Molla Mehmed b. Gazanfer ve Molla Mustafa b. Mehmed ve Aslan b. Bilâl.